WILLEMSTAD – Federashon Futbòl Kòrsou ta suprayá ku e karchinan di entrada pa e weganan di Mundial di Kòrsou durante e promé fase di grupo te awor por wòrdu optené solamente via e portal ofisial di karchi di FIFA: https://fifa-fwc26-us.tickets.fifa.com. Corendon no ta bende karchi separá pa wega; solamente paketenan di biahe i estadia. Kualke interpretashon òf publikashon tokante benta di karchi di wega via Corendon òf via un FFK-tickets booth ta inkorekto.
FIFA ta permití un máksimo di kuater (4) karchi pa kada kas. Debí na e demanda grandi tin un “FFK-tickets booth” na Capital C, riba djárason 17 di dezèmber. Aki fanátikonan por registrá pa karchinan adishonal riba e máksimo determiná pa FIFA. Tene kuenta ku esaki ta solamente un inskripshon i no un benta di karchi.
Basá riba informashon ku FFK tin te awor, FFK lo risibí un kantidat limitá di karchi komplementario di FIFA: 2 VVIP, 8 VIP, 20 asiento tékniko pa e staf i 50 karchi di kategoria 1. Ademas, FFK por kumpra 1050 karchi den e Football Community Allocation, di kua 852 lo ta disponibel pa fanátikonan ku tin un pakete di Corendon. E repartishon ta 700 karchi di kategoria 1, 200 di kategoria 2 i 150 di kategoria 3. E repartishon aki ta segun determinashon di FIFA. Den konsulta ku Corendon, FFK lo wak si e repartishon aki por wòrdu kambia, ku e meta di hasi mas karchi di kategoria 3, e kategoria mas ekonómiko, disponibel.
Un di kuater kategoria di karchi ta e asina yamá Ticket Allocation Groups (TAG). Mínimo 30% di e alokashon pa fanátiko mester ta destiná pa fanátikonan, miéntras máksimo di 70% por wòrdu destiná pa TAG. TAG mester ta organisashonnan afiliá ku futbòl i no por ta entidatnan komersial. Bou di TAG ta kai klupnan ku ta partisipá den kompetensianan lokal di futbòl, kompetensianan di futbòl femenino òf di hóben i asosiashonnan di rèfrinan.
Mañan djárason, 17 di dezèmber mainta, FFK lo tin un reunion pa medio di video ku e funshonario responsabel pa ticketing di FIFA. Riba djaweps, 18 di dezèmber, lo tin un konferensia di prensa kaminda e informashon mas aktual tokante karchinan di WK via FFK lo wòrdu kompartí.