WILLEMSTAD – Ayera den sala VIP na Stadion Rignaal Jean Fransisca, Stichting Overheidsaccountantsbureau (SOAB) i Federashon Futbòl Kòrsou (FFK) a firma un memorandum di entendimentu (MOU). E seremonia ofisial a tuma lugá den presensia di presidente di FFK, Gilbert Martina, Direktor SOAB Raymond Faneyte, Minister di Enseñansa Siensia Kultura i Deporte, Sithree van Heydoorn i Minister di Asuntunan General i Promé Minister di Kòrsou, Pik Pisas.
Ku e entendimentu entre e dos organisashonnan, SOAB a tuma un otro paso signifikante den su kompromiso pa aportá na konstrukshon di nos nashon dor di anunsiá un kolaborashon nobo ku FFK. Ku e aliansa aki, SOAB lo duna timnan di FFK diferente kurso riba tereno di maneho di organisashon, presupuesto i desaroyo di kapasidat.
E kolaborashon aki ta forma parti di programa di Responsabilidat Sosial Korporativo (CSR) di SOAB, ku ta karga e título “We Know. We Serve. We Care.” Ku e programa aki, SOAB ta pone su konosementu i eksperensia na servisio aktivo di organisashonnan den komunidat, ku e meta pa fortalesé nan i kontribuí na desaroyo duradero di Kòrsou.
E kursonan lo keda duná via SOAB Learning Lab i ta alineá ku e mishon mas amplio di SOAB pa fortalesé organisashonnan lokal i kontribuí na desaroyo sosial i ekonómiko di Kòrsou. Dor di mehorá e abilidatnan administratif i finansiero di timnan di futbòl, SOAB ta sostené organisashonnan ku tin un papel sentral den nos bario, pa asina por guia talentonan hóben miho i traha komunidatnan mas fuerte.
“Futbol ta parti di nos identidat nashonal,” SOAB ta indiká. “Dor di sostené esnan ku ta dirigí e klupnan, nos ta invertí den futuro di Kòrsou riba i pafó di vèlt.”
E programa lo kuminsá ku kursonan strukturá riba liderazgo, planifikashon, gobernashon i sostenibilidat finansiero. E fundeshi aki ta sostené e vishon a largu plaso kompartí pa tantu SOAB komo FFK: un ekosistema di futbòl resiliente ku ta inspirá orguyo i oportunidat riba henter e isla.