WILLEMSTAD – Riba djamars, 9 di desèmber 2025, Promé Minister sr. Gilmar Pisas, a risibí representantenan di Life After Football, sr. Soufian Asafiati i sr. Regi Blinker.
Esaki tabata un bishita di kortesia kaminda Life After Football a bini pa introdusí nan organisashon, presentá nan ideanan pa futuro i pa eksplorá área di interés komún.
Life After Football a presenta nan revista i un resumen di e aktividatnan di e delaster 3 aña na Kòrsou na Promé Minister Pisas. A papia tambe di e torneo di futbòl Legends ku ta organisá pa Curaçao Airport Holding i CTB, i kon e dos akitividatnan aki por komplementa otro den futuro.
Promé Minister Pisas a indiká ku esaki por trese un impulso pa nos isla, espesialmente den sektor di turismo, komo ku Kòrsou a kwalifiká pa e Kopa Mundial.
E bishita a tuma lugá den un esfera ameno basá riba bon entendimentu i kolaborashon, pa sigui mantené un diálogo kontinuo na benefisio di Kòrsou.