WILLEMSTAD – SV Victory Boys ta sumamente orguyoso ku kuater di su hungadornan a wòrdu selekshoná pa forma parti di nos selekshon nashonal femenino, ku lo hunga nan prome wega den e ‘Concacaf W-Qualifiers’.
E hungadornan selekshona ku lo militá den Victory Boys ‘Senior Women’s Team’ ta Kadisha Martina, Ignarda Pieternella, Riesmarly Tokaay, i Gervionna Martina.
Dia 30 di novémber nos selekshon lo hunga kontra di Panama na Stadion di FFK pa 20:00. Komo ya a bira e kustumer, SV Victory Boys lo sigui apoyá e desaroyo di futbòl femenino na Kòrsou i lo tei dia 30 di novémber ku un delegashon grandi di nos tim maskulino di prome divishon, nos tim femenino i staff, pa apoyá nos hungadónan i selekshon nashonal femenino.
“Nos ta hopi kontentu ku Kadisha, ‘Narda’, ‘Tokaay’ i ‘Joontje’, ku nan ta forma parti di nos selekshon femenino, i lo representa nos pais. Pa Victory Boys ta importante pa e mensahe yega ku futbòl femenino i nos selekshon femenino tambe ta forma parti di e Blue Wave. Nos hungadónan ta un ehèmpel pa hopi i aworaki nos muchanan por wak nan ta hunga na Kòrsou, komo ‘role model’ femenino, ta representá nos bandera. Si nos inverti den nos selekshon femenino, mi no tin niun duda ku un dia Kòrsou su himno lo toka na un Mundial Femenino tambe! Nos ta hopi orguyoso di nos hungadornan, i ta deseá nan i nos selekshon nashonal tur klase di éksito. Nos lo sigui apoyanan, i yuda sostené e futbòl femenino na Kòrsou” Hassnah Elhage, presidente di Victory Boys a deklará.
Victory Boys ta e ‘hofleverancier’ lokal ku 4 hungadó den selekshon femenino di Kòrsou.