WILLEMSTAD – Despues di e tremendo éksito di nos selekshon maskulino, Federashon di Futbòl Kòrsou ta presentá nos ekipo senior femenino ku lo enfrentá Panama dia 30 di novèmber 2025 den Stadion Rignaal ‘Jean’ Francisca. E presentashon akí sin duda ta un otro punto kulminante pa desaroyo di futbòl femenino riba nos isla. Un selekshon konsistiendo tantu di talentonan lokal komo internashonal, sostené pa un staf tékniko i médiko fuerte, kla pa e partido krusial den CONCACAF W-Qualifiers.
E partido di kualifikashon kontra Panama ta parti di e ruta pa yega na e siguiente fase di e torneo internashonal di CONCACAF. Pa Kòrsou esaki ta un oportunidat pa midi forsa kontra oponentenan konosí, haña eksperensia balioso i sigui posishoná futbòl femenino ku ta kresiendo bastante rápido den nos region.
E selekshon di Kòrsou ta konsistí di hungadónan motivá, salí tantu di klupnan lokal komo di klupnan internashonal. Nan energia, disiplina i spiritu di tim ta demostrá ambishon pa representá Kòrsou dignamente na e nivel mas haltu. Kada hungadó ta sinti e responsabilidat i e orguyo pa representá nos isla ku kurashi, determinashon i konfiansa.
Tras di e selekshon tin un grupo uní ku ta forma e motor di e tim. Bou di direkshon di ‘headcoach’ Johan van Heertum, e staf tékniko, ‘coach asistente’ Heinrich Roojer ku Gamal Douglas i ‘keeperstrainer’ Pablo Alomá Mark ta traha tur dia riba struktura, strategia i entrenamentu orientá riba resultado. E kuido físiko i médiko ta atministrá dor di Denice Linger-Berggraaf i Dianne Winklaar kende ta e masagistanan di nos selekshon. Huntu ku dòkter Eartha Helstone, ta sigurá ku kada hungadó ta kla pa subi tereno den e mihó kondishon. Jadira Laaf ta esun enkargá ku kuido di e materialnan, Cristine Davelaar ta e ‘team manager’ i hefe di delegashon lo ta Fabi Constansia ku ta traha duru pa mantené tur kos na òrdu patras di e kòrtina. Huntu, nan ta krea un fundeshi sólido riba kua e hungadónan por konta kompletamente.
E siguiente hungadónan ta forma parti di nos selekshon;
-
- Ruwenna Cristina (Undeba)
- Ignarda Pieternella (Victory Boys)
- Riesmarly Tokaay (Victory Boys)
- Gervionna Martina (Victory Boys)
- Kingnaichely Provence (Jong Holland)
- Thiheyna Susana
- Charnainelys Andrea (Excellence School)
- Kadisha Martina (Cumberland University, Merka)
- Rozan Snoek (HBC, Hulanda)
- Lindsey Hart (Excelsior Maasluis, Hulanda)
- Naychelene Nisia (Sparta Rotterdam, Hulanda)
- Kyara Bernadina (FC Skillz, Hulanda)
- Diangely’s Strijdhaftig (FC Skillz, Hulanda)
- Raëngelly Keller
- Taïsha Hansen (Be Quick’28, Hulanda)
- Ludmarie Flaneur (BVV Barendrecht, Hulanda)
- Shermilyene Leito (MSV Duisburg, Hulanda)
- Jeleaugh Rosa (Acharnaikos Women Football Club, Hulanda)
- Chelsea Kenton (WH HEDW, Hulanda)
- Shi-jona Martina (Excelsior Rotterdam, Hulanda)
- Akisha Lohman (Be Quick’28, Hulanda)
- Destiny Koko (De Graafschap, Hulanda)
Karchinan pa e partido di Kòrsou kontra Panama ta kosta fl.10,- pa tur hende ku tin 6 aña bai ariba. E karchinan lo ta disponibel na e lokètnan di stadion un ora promé ku e partido inisiá i tambe ‘online’ for di djárason riba via e plataforma ofisial di FFK: https://shop.ffk.cw/event-details/2025-26-concacaf-w-qualifiers-curacao-vs-panama-1.
FFK ta hasi un yamada na pueblo pa bin sostené nos damanan na grandi kantidat. E forsa di públíko ta di importansia durante un partido internashonal asina krusial. Huntu nos ta mas fuerte, huntu nos ta pinta e stadion blou! Sigurá bo entrada na tempu i laga nos bos tembla e stadion dia 30 di novèmber!