WILLEMSTAD – Federashon Futbòl Kòrsou ku orguyo ta anunsiá ku Johan van Heertum a keda nombrá komo e ‘bondscoach’ di e ekipo di futbòl senior di hende muhénan di Kòrsou. E nombramentu aki ta marka un paso krusial den e proseso di profesionalisashon i kresementu di futbòl femenino riba nos isla, konforme e enfoke stratégiko ku ta dirigí riba kresementu sostenibel i e stimulashon di talentonan den futbòl femenino.
FFK ta yama Johan van Heertum kaluroso bonbiní i ta mira pa dilanti ku konfiansa den e fase nobo di kresementu di futbòl femenino na Kòrsou. Van Heertum lo tin un ròl krusial den e desaroyo i profesionalisashon di e ekipo di futbòl femenino di Kòrsou, meskos ta e kaso ku e programa amplio di futbòl femenino na enkargo di FFK. Su debut komo ‘bondscoach’ lo tuma lugá dia 30 di novèmber próksimo, 8’or di anochi, na momentu ku Kòrsou ta enfrentá Panama aki na Kòrsou.
Johan van Heertum a traha for di aña 1990 den seno di Koninklijke Nederlandse Voetbalbond (KNVB) riba tereno di asuntunan tékniko di futbòl. E tabata ‘bondscoach’ di e ekipo femenino Hulandes U-19 durante e temporada 2001/2002, kontinuando te 2011. Ademas van Heertum tabata asistí e ‘bondscoach’ di e ekipo femenino Hulandes, kategoria U-17 i mas aleu aktivo tambe den diferente ekipo hubenil, manera U-15, U-16 i U-17.
E nombramentu di señor van Heertum ta kuadra ku e enfoke stratégiko “Desaroyá futbòl femenino na Kòrsou”, kaminda FFK ta komprometé ku un ekosistema inklusivo i kompetitivo ku ta fomentá desaroyo di talento for di e nivel mas abou te na esun di mas haltu. Su ekspertisio i amplio konosementu den futbòl femenino internashonal lo ta un gran atkisishon den nos selekshon i tambe un pilá den e desaroyo di futbòl femenino aki na Kòrsou.