JAMAICA – Federashon di Futbòl Kòrsou ta ekspresá su mas profundo solidaridat ku muchanan di famianan ku a wòrdu afektá pa e desaster natural ku a tuma lugá resien den e parti wèst di Jamaica. Den e espíritu di “kompartí ta nifiká duna”, FFK i e ekipo nashonal di futbòl di Kòrsou a tuma e inisitiva pa sostené esnan den nesesidat.
E donashon a wòrdu entregá na e Konsulado Honorario di Hulanda na Jamaica, Sra. Alyssa Aimée i e ‘coach’ di St. John’s High School na Montego Bay, ku a risibí e donashon na nòmber di e muchanan, den presensia di seis di e hóbennan di Maldon High School i Montego Bay United ku ta un klup di futbòl.
Pa komprondé e desafionan ku e famianan lokal i prinsipalmente e muchanan ta enfrentando, FFK a tuma kontakto ku e Konsulado Honorario di Hulanda na Jamaica i e federashon di futbòl di Jamaica (JFF) pa organisá un donashon ku materialnan ku realmente ta nesesario. Maske federashon i e hungadónan no por a bishitá e área afektá direktamente, e skol i e klup a risibí ekspreshon di kombibensia i un donashon di balanan di futbòl, ‘hesjes’ i pionnan.
“E ekipo nashonal di Kòrsou ta kontentu i gradesido di por a duna e sosten akí”, sr. Gilbert Martina, presidente di FFK a deklará. “Nos ta na Jamaica no solamente pa e partido di kualifikashon pa Mundial 2026 ku ta tuma lugá djamars 18 di novèmber, sino tambe pa demostrá nos sentido di kombibensia i pa para huntu ku e pueblo di Jamaica den e tempu difísil akí.”
FFK, hungadónan, staf di e ekipo nashonal di Kòrsou i e Konsulado Honorario di Hulanda a ekspresá e mas profundo gratitut na Jamaica pa e kaloroso bon biní risibí i ta deseá e pais lo mejor den e proseso di rekuperashon i rekonstrukshon.
E gesto akí ta enfatisá e union fuerte entre Kòrsou i Jamaica i ta konfirmá e kompromiso di FFK ku komunidat, atraves di solidaridat i e forsa di union ku futbòl tin.