WILLEMSTAD – Federashon Futbòl Kòrsou i Kelme ta mira bèk riba un kolaborashon éksitoso. For di e kuminsamentu di e kolaborashon, Kelme a kontribuí ku dedikashon na e aparensia profesonal di e selekshon nashonal maskulino, e selekshonnan hubenil, e selekshonnan femenino i tambe e Blue Wave Academy di Kòrsou.
Gilbert Martina, presidente di FFK, a enfatisá: “Nos ta gradisí Kelme pa e kolaborashon. Kelme a yuda nos den un tempu desafiante pa nos federashon i a yuda nos presentá nos selekshonnan nashonal na un manera profesonal. Nos ta mira bèk ku apresio riba e kolaborashon i ta deseá Kelme hopi éksito ku nan aktividatnan internashonal den futuro.”
Kelme, huntu ku e direktiva anterior di FFK, a pasa den un proseso kuidadoso pa yega na un bunita kolaborashon i un kolekshon atraktivo, kaminda tur hende, amigu i kontrario, a rekonosé ku tabata un liña úniko. E direktiva nobo a skohe pa un direkshon diferente, algu ku nos por respetá sigur. Nos ta mira bèk ku orguyo riba loke nos a logra huntu.
Kelme ta deseá FFK i tur afishonadonan di futbòl di Kòrsou hopi éksito den futuro.