WILLEMSTAD – Federashon di Futbòl Kòrsou ta kondená severamente e insidentenan grave ku a tuma lugá for di momentu ku a kuminsá e kompetensia lokal di futbòl. Dia 18 di òktober último ta tin un kaso di violensia serio durante un partido di hubenil, kaminda tantu hungadó komo fanátiko a wòrdu agredí. Dia 7 di novèmber último tambe un hungadó di un ekipo den Terser Divishon a agredí un árbitro físikamente durante un partido.
E tipo di komportashon aki ta totalmente inaseptabel i ta kontra e balor i normanan ku FFK ta para p’e ku firmesa i orguyo.
FFK ta konsiderá integridat di e deporte, protekshon i siguridat di tur partisipante, komo e pilá fundamental di futbòl na Kòrsou. E komishon Disiplinario i Étiko di nos federashon ta investigando e insidentenan ariba menshoná i tin e outoridat pa duna sanshon, suspenshon pa tempu largu òf un prohibishon di partisipashon den partidonan ofisial di FFK.
E susesonan aki ta enfatisá e importansia di e stratégia ku FFK a definí den su Plan Stratégiko 2025–2029, kaminda ke garantisá un ambiente di futbòl sigur i respektuoso ku ta un di e pilánan prinsipal.
FFK ta aspirá pa stimulá un kultura di futbòl kaminda hungadó, entrenadó, direktiva di klup, árbitronan, fanátikonan i demas partisipantenan por disfrutá di e deporte ku siguridat, rèspèt i deportividat.
FFK ta keda enfatisá pa promové disiplina, rèspèt i ‘fair play’ den futbòl na Kòrsou. Violensia, di kualke forma, lo no ser tolerá, ni riba, ni rondó di tereno di futbòl i lo ser tratá di un forma severo.