WILLEMSTAD – E Concacaf Women’s Under-17 Qualifiers, e torneo di kualifikashon pa e Kampionato Mundial di FIFA pa hungadónan demenino bou di 17 aña, lo tuma lugá aki na Kòrsou, for di 24 di yanüari te ku 2 di febrüari 2026.
Durante e momento di kualifikashon importante akí, 8 selekshon nashonal for di Norte i Sentro Amerika i Karibe lo kompetí na Kòrsou pa gana un lugá den e kampionato mundial.
E partidonan aki lo trese e mihó futbolistanan hende muhé hóben di e region huntu i ta duna nan un oportunidat úniko pa midi forsa riba nivel internashonal i desaroyá nan talento.
E echo ku Kòrsou ta anfitrion di e torneo akí ta un paso klave den e vishon riba plaso largu di Federashon Futbòl Kòrsou pa pone futbòl di Kòrsou riba mapa mundial. E vishon akí ta dirigí riba kresementu duradero, infrastruktura fuerte i desaroyo inklusivo den deporte. Además, e evento akí ta kontribuí na e meta stratégiko di FFK pa fortalesé futbòl femenino i logra kualifikashon pa e Kampionato Mundial FIFA U-17 di 2026.
“Nos ta honrá ku Kòrsou atrobe por yama bonbiní na e mihó futbolistanan hóben di e region,” segun Gilbert Martina, presidente di FFK. “E torneo aki ta un paso importante den nos mishon pa sigui laga futbòl femenino krese, inspirá e próksimo generashon i amplia e legado futbolístiko internashonal di Kòrsou.”
E Concacaf Women’s Under-17 Qualifiers ta forma e ruta prinsipal pa kualifikashon pa e Kampionato Mundial di FIFA pa hungadónan femenino di kategoria U-17. Kuminsando for di 2025, e kampionato mundial aki lo amplia na 24 selekshon i lo tuma lugá anualmente na Maruekos te ku aña 2029. Concacaf lo disponé di kuater tiket dirèkt pa e mundial, ku ta duna mas pais oportunidat pa partisipá na e nivel mundial.
E edishon di aña 2026 lo ta e segundo di akuerdo ku e formato di torneo nobo, ku seis grupo di selekshon ordená entre posishon 5 te ku 41 den ranking di Concacaf. Despues di e fase di grupo, e ganadó di kada grupo i e dos mihó number dosnan lo pasa pa e siguiente ronda.
Kòrsou a sirbi komo anfitrion pa e Concacaf Women’s Under-17 Qualifiers na aña 2023 i FFK ta orguyoso di por trese e torneo prestigioso akí bèk na nos isla.