WILLEMSTAD – Djasabra 18 di òktober 2025 último, nos selekshon nashonal femenino kategoria U-17 i selekshon nashonal Senior a biaha pa Hulanda pa un ‘trainingskamp’, komo preparashon pa e kompromisonan ofisial di CONCACAF den kategoria U-17 i Senior.
E biahe aki a bira posibel danki na nos patrosinadó prinsipal Corendon Mangrove Beach Resort Curaçao. Corendon a sòru pa hasi e buelo posibel i tambe e parti estadia di e delegashon. Tambe FFK ta hopi agradesí na CG United ku a proveé e seguro di biahe pa e hungadónan i staf di ámbos selekshon.
Durante e ‘trainingskamp’ aki e selekshonnan lo pasa e promé parti di nan estadia den Corendon Village Amsterdam i e di 2 fase den Van der Valk Hotel Sassenheim-Leiden.
E meta prinsipal di e ‘trainingskamp’ ta pa prepará pa e kompetensianan binidero i tambe pa fortalesé e unidat e grupo. Mirando ku den nos selekshon tin hungadónan ku ta bin di diferente pais nos a krea e oportunidat aki tambe pa por trese e hungadónan lokal i esnan den eksterior (Colombia, Zwitserland i Hulanda) huntu den e ‘window’ di FIFA ya asina nan ta integrá i konosé otro mas.
Nos selekshon femenino senior ta den preparashon intensivo pa e 2025-2026 Concacaf Woman Qualifiers. Kòrsou ta forma parti di Grupo E huntu ku Panamá, Cuba, Saint Kitts & Nevis i Aruba. Nos promé partido na kas lo tuma lugá djadumingu 30 novèmber 2025 pa 8’or di anochi den Stadion Rignaal ‘Jean’ Francisca kontra Panama.
Komo parti di e preparashonnan nan lo hunga un partido amistoso na hulanda. Dia 21 òktober último nan a hunga kontra Ter Leede i djabièrnè nan lo hunga kontra e selekshon femenino senior di Surinam.
Nos selekshon femenino U-17 tambe ta den preparashon intensivo pa e CONCACAF Women’s Under 17 Qualifiers ku lo tuma luga entre 24 yanüari i 2 di febrüari 2026 aki na Kòrsou. Ku orguyo nos ta anunsiá ku Kòrsou lo ta un di e tres anfitrionnan di e torneo aki.
Nos selekshon ta den Grupo F, huntu ku El Salvador, Trinidad & Tobago, Barbados i Guadeloupe. E promé partido di Kòrsou lo tuma luga dia 24 yanüari 202 kontra Trinidad & Tobago.
Durante e ‘trainingskamp’ aki nos muchanan a hunga kontra Hera United i djasabra awor nan lo hunga kontra PSV U-17.
FFK ta hopi kontentu ku e gran oportunidat aki i ta gradisí tur spònser, staf i e hungadónan ku ta kontribuí na e desaroyo di futbòl femenino.
Ku determinashon, pashon i trabou den ekipo, Kòrsou ta kla pa duna bon bataya riba nivel internashonal!