WILLEMSTAD – Riba djabièrnè 24 di òktober, señor Victor Montagliani, presidente di Confederation of North, Central America and Caribbean Association Football (CONCACAF), lo hasi un bishita ofisial na e Federashon di Futbòl Kòrsou (FFK) i Kòrsou.
Durante e bishita di trabou di un dia akí, señor Montagliani lo sigui un programa ekstenso ku ta kompletamente enfoká riba e kresementu adishonal di futbòl kurasoleño i e mehorashon di e kolaborashon regional.
Riba e agènda tin reunionnan ku e direktiva nobo di FFK, representantenan di e klupnan i otro miembronan di FFK, e Promé Minister, e Minister di Enseñansa, Kultura, Siensia i Deporte (OCSW) i lo hiba kòmbersashonnan ku spònser i periodistanan tambe.
Señor Victor Montagliani ta liderá CONCACAF for di mei 2016, eligí abase di su vishon “ONE CONCACAF”, ku ta enfoká riba un mihó maneho di futbòl, mas torneo kompetitivo i oportunidatnan igual pa tur 41 estado miembro. Bou di su liderazgo, CONCACAF a implementá kambionan remarkabel, manera e kreashon di CONCACAF Nations League, e re-strukturashon di e skemanan internashonal di wega pa tantu hende hòmber komo hende muhé, i e kreashon di Concacaf W, un programa stratégiko enfoká riba e kresementu di futbòl di hende muhé. Ku su re-elekshon na aña 2023 pa un periodo nobo te ku 2027, miembronan a mustra nan konfiansa den su liderazgo i vishon pa futuro. Montagliani no ta solamente presidente di CONCACAF, sino tambe visepresidente di FIFA, miembro di e konseho di FIFA, presidente di FIFA Football Stakeholders Committee i presidente di e Hunta di Direktiva di FIFA Ticketing AG.
E bishita di Victor Montagliani na Kòrsou ta marka un momento krusial pa futbòl lokal; un rekonosementu di e progreso ku ya a wòrdu lográ i un estímulo fuerte pa mas desaroyo, profeshonalisashon i kolaborashon internashonal. E bishita importante akí ta enfatisá e ròl krusial ku Kòrsou ke hunga den e futuro di futbòl regional.