WILLEMSTAD — Djabièrnè dia 20 di mei 2022, S.V. Pichingolo Nissan/Kia a organisá un ameno sena pa tur su miembronan komo gradisimentu pa e tremendo aña 2021 i tambe pa selebrá e di 49 aniversario di e organisashon di spònser pa e prestigioso empresa “Universal Motors”, representante di e markanan di outo “Nissan” i “Kia”.
E sena a tuma lugá na e prestigioso restorant “La Hacienda Olivia” serka Michael Grunning. Animashon tabata manera tur djabièrnè na enkargo di e tremendo duo ku ta konsistí di e gran músiko Axel Pikero i e fabuloso kantante July Bridgewater.
Promé di a saboriá e dushi sena a hiba palabra primeramente sr. Ralph Pereira, ku na nòmber di direktiva a gradisí tur e miembronan pa e tremendo aña 2021 i motivá nan pa sigui trahá ku e mesun entusiasmo i dedikashon den aña 2022.
Seguidamente sr. Glenn Engelhart, di e komishon organisadó huntu ku sra. Nadira Romano-Louisa, a dirigí algun palabra na e presentenan.
E último orado tabata sr. Fenton Thomasita ku a introdusí e bunita i humilde premio anual di estímulo, “Corva Lourens”.
Sra. Corva Lourens tabata un eks hungadó i miembro di direktiva di Pichingolo Nissan/Kia. Tanchi Corva, manera tabata yam’e, tabata un persona trahadó i hopi stima ku lástimamente a fayesé aña pasa. Komo rekonosimentu pa tur loke e la nifiká i hasi pe organisashon di Pichingolo Nissan/Kia, direktiva a disidí, ku aprobashon di su yunan Amanda i Dianthe van der Linde, pa introdusí den forma di un trofeo e premio anual di estímulo, “Corva Lourens”. Meta di e premio ta pa motivá e hungadónan pa nan hasi máksimo uso di nan talento i duna rekonosementu pa nan prestashon, kaminda dedikashon i disiplina ta hunga un ròl hopi importante. E trofeo a wòrdu diseñá i trahá pa “Fantasy Arts”. E bunita mensahe riba e trofeo ta bisa:
Trabou duru, sakrifisio, pèrseveransia, disiplina i mas importante, AMOR pa loke bo ta hasi, semper ta superá talento si talento no hasi sufisiente esfuerso.
E promé ganadó di e premio a resultá di ta e hungadó srta. Abigail Daal. Abi, apesar di no ta un hungadó regular, semper a hasi esfuerso pa e ta semper disponibel pa ora su mènedjer mester di sea su bate i/òf su wante. Prueba di esaki ta e gran hugadá (over the shoulder catch) ku Abi a hasi den “leftfield” pa terminá e último wega di kampionato regular di Pichingolo Nissan/Kia ku un triunfo.
Pa terminá, direktiva di Pichingolo Nissan/Kia ke hasi uso di e oportunidat aki pa gradisí tur esunnan ku di un òf otro manera a hasi e evento aki posibel i ta spera di por sigui konta ku nan kooperashon.