WILLEMSTAD — Ta ku grato plaser nos por anunsiá ku e mantenshon di tantu e mastnan komo e sistema di iluminashon den Tio Daou Ballpark a inisiá.
Ta trata aki di un total di 6 mast di iluminashon di entre 24 i 27 meter ku lo risibí e mantenshon nesesario i di kua lo probechá pa kambia tambe tur e peranan LED ku ta kimá den nan.
E mesun kompania ku a instalá e sistema di iluminashon ta enkargá tambe ku e mantenshon aki ku ta keda realisá kada pasa kuater pa sinku aña.
Ta apliká e sistema di mantenshon aki pa evitá ku e mastnan ta deteriorá demasiado i pone ku mester desmantelá esaki den su totalidat pa por hasi e mantenshon nesesario i konsekuentemente lo hasi e trabounan i e gastunan muchu mas grandi.
Mester remarká ku e trabounan lo ta kla pa e kampionato di beisbòl little league i su serinan di playoff por tuma lugá. Meskos ta konta tambe pa e kampionatonan di beisbòl hubenil, klase A i dòbel A ku lo mira akshon den un sistema di iluminashon kompletamente renobá.
E famoso evento di tur fin di aña ‘baseball week’, ku ta konta ku partisipashon di mayoria di nos peloteronan profeshonal, tambe ta tuma lugá den Tio Daou Ballpark.
Un primisia tambe ta e echo ku e federashon di beisbòl di Hulanda, KNBSB, tambe ta planiando algun evento relashoná ku e posibel prospektonan i e selekshon di beisbòl di Hulanda ku ta tuma lugá den Tio Daou Ballpark.
Pues sigur lo bira un aña kargá ku basta aktividat atrobe despues di dos aña di no muchu aktividat pa loke ta e deporte di beisbòl. Un danki na tur e patrosinadornan i tambe e boluntarionan ku a i ta dunando un man konstantemente pa nos por mantené Tio Daou Ballpark den óptimo kondishon.