WILLEMSTAD — Djadumingu, 16 di dezèmber último SUBT den koperashon ku FFK a organisá un tremendo klínika pa damanan ku ambishon pa e deporte di futbòl di 6 pa 21 aña di edat. E klínika a karga e nòmber; ‘Curaçao’s Mission for Woman’s Football’ i a tuma lugá di 8:30am-12:30pm na Stadion Dr. Antoine Maduro (SUBT).
E klínika aki tabata na enkargo di e èks futbolista profeshonal, entrenadó di dama i ‘scout’ pa KNVB, Renée Slegers. Aparte di Renée Slegers ku ta tei di bishita na nos dushi isla pa duna e klínika aki, Rocky Hehakaija tambe ta tei i a hasi e evento aki aun mas grandi. Rocky Hehakaija ta konosí riba plano internashonal komo un futbolista di kaya hopi famoso i ta keda konsiderá un ‘rolemodel’. Rocky huntu ku Philip Veldhuis ta e fundadónan di e ‘Stichting Favela Street’ na paisnan manera Brazil, Haiti ku Hulanda. Aparte di esei Rocky ta biaha rònt mundu pa inspirá damanan futbolista i yuda promové futbòl di kaya.
Un grupo di alrededor 60 partisipante a inskribí pa e klínika aki i a keda repartí den gruponan chikí abase di nan edat. Nan a haña 4 seshon di training pa despues haña algun tep riba diferente téknika i táktika di futbòl serka Renée ku Rocky. Na final di e klínika ta tin algun torneo chikí pa pone den práktika tur loke a wòrdu duná durante e klínika.
Un i tur por mira bèk riba un dia eksitoso kargá ku informashon balioso i kosnan nobo ku nan lo por usa den futuro pa ehersé nan deporte preferí, futbòl.
Meta di e klínika aki tabata pa promové i engrandesé futbòl di dama aki na Kòrsou i ta e intenshon pa den futuro sigui organisá mas di e tipo di eventonan aki pa nos damanan.
FFK i SUBT ta gradisí tur e damanan ku asistí na tremendo klínika aki i ta spera di por sigui oumentá e interes serka nos damanan pa nan tambe forma parti di un ekipo i praktiká futbòl!