WILLEMSTAD – Danki na yudansa finansiero di gobièrnu di Kòrsou e trabounan pa drecha nos stadion nashonal a start djaluna último, 12 febrüari 2018 i lo terminá aproksimadamente pa promé mart 2018.
Manera ya ta konosí, Stadion Ergilio Hato for di novèmber 2016 no por wòrdu usa pa weganan di futbòl ya ku e yerba artifisial a ser dañá durante un konsierto ku a tuma lugá den SDK.
Despues di hopi lucha i ku koperashon di gobièrnu, e trabounan a kuminsá. Den komienso di mart e deporte rei, futbòl lo por bolbe kuminsá hasi uso di nos stadion nashonal.
E trabounan ta tumando lugá den 4 fase kaminda a parti e tereno den 4 pida i ta lanta e yerba fase pa fase pa asina por drecha e superfisio ku a ser dañá. Tanten ku ta drechando e parti abou di e yerba di e promé parti ta kita e yerba di e di 4 parti pa e tambe wordu drechá. Despues ku e parti abou di fase 1 ta kla drechá ta bòltu e yerba bèk i poné na su luga. Asina lo sosodé ku e otro fase nan tambe.
Ta kalkulá ku tur trabou lo terminá promé di mart 2018. Despues di esaki e partidonan di futbòl por bolbe mira akshon den SDK. Miéntras preparashonnan pa e weganan di nos selekshon nashonal di dia 23 i 26 mart próksimo kontra e selekshon di Bolivia lo por tuma lugá den nos stadion nashonal.
Un danki ta bai na gobièrnu di Kòrsou, Edelgras, CWM i tur esnan ku a hasi posibel ku futbòl por bolbe hasi uso di SDK. Tabata ku esfuerso grandi di presidente di FFK ku e trabounan por a kuminsá na tempu pa asina pa otro luna futbòl por bolbe kuminsá hasi uso di nos stadion nashonal. Despues di mas ku 1 aña i 4 luna ku e tereno tabata dañá.
Un danki tambe ta bai na Fundashon Barika Hel i Stadion Dr. Antoine Maduro kaminda tur nos weganan di kampionato a tuma lugá i lo sigui tuma lugá repartí entre stadion Dr. Antoine Maduro i Stadion Ergilio Hato.
Fanatikonan di futbòl prepará boso pa por wak nos weganan di kampionato i e gran enkuentronan di nos selekshon nashonal kontra Bolivia na mart próksimo.