Selekshon di Kòrsou ya ta na Canada pa asina enfrentá Canada mañan

WILLEMSTAD — Despues di 3 dia di trainingnan intensivo den KNVB Sport Complex na Zeist, ayera djadumingu 11 di yüni, nos selekshon nashonal a sali pa Canada pa enfrentá e selekshon di Canada den un wega di fogeo komo preparashon pa e 2 evento grandi nan ku nos selekshon tin na kaminda.

Nos kuerpo tékniko i e sobra hungadónan di nos selekshon residensia na Kòrsou tambe a sali den oranan di mainta rumbo pa Canada pa huntu ku e grupo ku a sali di Hulanda sigui ku e preparashon nan pa e wega di fogeo kontra Canada.

E partido aki lo tuma lugá djamars 13 yüni próksimo den e stadion Saputo na Montréal, Canada pa 7:30pm ora di Canada.

E siguiente dia, 14 di yüni, nos selekshon lo bin Kòrsou pa sigui ku e training nan pa e wega di fogeo kontra Nicaragua.

E partido kontra Nicaragua lo tuma lugá djasabra 17 yüni 8’or di anochi den Stadion Antoine Maduro (SUBT).

Karchinan pa e partido aki lo ta optenibel na FFK bou di ora di ofisina, Botika Mampuritu, Beep Beep i pòmp di gasolin Santa Maria.

Dia di wega karchinan lo ta optenibel na e lokèt nan di Stadion Antoine Maduro.

E partido ta kuminsá 8’or di anochi pero portanan ta habri for di 5’or di atardi, yega trempan pa evitá e tráfiko!

E preisnan pa e diferente sekshonnan ta lo siguiente:

  • Sekshon A; Tribuna pariba di tribuna di honor ta Fl.50,-
  • Sekshon B; Tribuna patras di golnan na lado di Maripampoen ta Fl.25,-
  • Sekshon C; Tribuna patras di golnan na lado di Willemstad òf Tribuna pabou di tribuna di honor ta Fl.25,-
  • Den e sekshon B i C (tribuna patras di golnan) mucha te ku 12 aña i 60+ ta paga Fl.15,-

Tambe nos tin e famoso shalnan atrobe ku diseño nobo i adaptá spesial pa nos klima. E shalnan aki ta optenibel na FFK bou di ora di ofisina i ta kosta solamente fl. 25,-

Un yamada ta bai na hinter e pueblo di Kòrsou pa bin na bòshi, bin disfrutá di un tremendo partido! Sali ku bo bandera di Kòrsou, bo t-shirt, bo shal, bin apoyá i sostené nos hungadónan komo e number 12!