MERKA — Manera ta konosí despues di e Klásiko Mundial di Beisbòl e picher yu di Kòrsou Jair Jurrjens a yega na un akuerdo ku e ekipo di Los Angeles Dodgers. E picher di 31 aña tabata agente liber i a hasi uso di e Klásiko di Beisbòl pa pone su nòmber bek riba mapa di ekiponan Amerikano.
For di promé ku e Klásiko Jurrjens tabata tin interes di algun ekipo. Kansas City Royals tabata un di e ekiponan kaminda e picher yu di Korsou a tira pa su skoutnan. Sin embargo, nada no a sali for di e oportunidat aki. Tabata despues di e Klásiko di Beisbòl ku Jurrjens a sinta ku Los Angeles Dodgers i a yega na un akuerdo ku nan.
Ofisialmente Jair a keda pone riba e roster di Oklahoma City Dodgers. Esaki ta e ekipo di tripel A di e organisashon di Dodgers.
Peloteronan profeshonal ayera:
- Segun informashonnan, Didi Gregorius a kuminsá tira bek. Aktualmente e pelotero di New York Yankees ta riba lista di hungadó inkapasitá pa 10 dia bayendo bek na 30 di mart. Didi e leshoná den un partido di fogeo kontra Arizona Diamondbacks den luna di mart último durante di e Klásiko Mundial di Beisbòl.
- Andrelton Simmons a bai di 4-1 ku dos kareda a anotá pa Los Angeles Angels den Liga Grandi. Simmons tin un promedio di .286.
- Wladimir Balentien a bai di 2-1 ku su promé honron di temporada i un base por bola. Balentien a keda ekspulsá for di e partido aki despues di un forsageo. E pelotero di Kòrsou a keda multa na un suma di 200,000 Yen ($1800). Sin emabrgo e no a risibí suspenshon.