Diegomar Markwell ta habri awe pa Tim di Reino

HAPON — Despues di a kibra invikto di e tim di Israel, e Tim di Reino Hulandes ta den ful preparashon pa topa e siguiente kontrinkante. Djamars 14 di mart 2017, pa 11’or di anochi ora di Kòrsou, e Tim di Reino ta enfrentá e Cubanonan pa determiná si ta pasa pa semifinal.

Diegomar Markwell lo ta riba montikulo pa habri e partido di awe kontra Cuba.

E speransa di yega semifinal a keda bibu durante di e partido kontra di Israel paso e Tim di Reino a presta di forma impreshonante. E hungadónan guiá pa Hensley Meulens a hinka total 12 kareda i e kontrinkante a anotá solamente 2 kareda. Ku un bon bataso di Yurendell de Caster tantu Didi Gregorius komo Jonathan Schoop a anotá e promé dos karedanan. Didi Gregorius i e debutante Shawn Zarraga a bati doblete pa hinka tres di e kuater karedanan.

Den di kuater inning e skor a yega 10 pa 0 na man di bateo di Wladimir Balentien i un bataso kuadrangular di Didi Gregorius ku a sòru pa tres kareda. Al final, e Tim Oraño a logra 15 hit ku e protagonistanan Wladimir Balentien (4-3), Yurendell de Caster (5-3), Andrelton Simmons (5-3) i Didi Gregorius (3-2). Debí na e bateo fantástiko, e picher habridó Jair Jurrjens a haña tur trankilidat pa bira e promé picher ku a sera kuater inning pa e tim aki.

Awor tur konsentrashon ta riba preparashon pa e partido kontra di Cuba. Den e edishon anterior di World Baseball Classic (WBC), Tim di Reino a sa di gana Cuba i pone ku nan no a pasa pa semifinal. Den e promé buèlta di WBC e aña aki Cuba a forma parti di Grupo B den kual nan a pèrdè e promé partido kontra Hapon pero a gana di China i Oustralia. Despues e Cubanonan a pèrdè kontra Israel i tin un partido mas pendiente kontra Hapon promé ku topa Tim di Reino.

Miéntras tantu mènedjer Hensley Meulens ta duna e Tim di Reino un deskanso bon meresí. Meulens a duna di konosé ku: “Nos tabata asina kontentu ku e viktoria di e di dos partido kontra di Taiwan, esun ku nos a pasa pa e di dos buèlta kun’é. Por sierto e partido a kaba hopi lat i nos a disidí pa no hasi e seshon di batting practice e dia siguiente promé ku e partido kontra Israel. Siman pasá e hungadónan tabata kansá i ala bes emoshonal pa e partido kontra Israel.”

Meulens a sigui bisa ku: “Nos ta bai hasi kosnan diferente e biaha aki. E hungadónan ta haña un dia liber. Nos tin sigur dos siman ta traha duru sin dia liber. Deskanso ta mes un importante ku traha duru. E tim tin mester di deskansá i despues di tur e esfuersonan, nan tin derechi riba esaki pero nos no ta bai rilèks paso nos mester ta fuerte pa e partido kontra Cuba.”

Tambe Meulens a reflehá riba e kambionan di hungadó: “Mester tene kuenta ku situashon di kada hungadó i tin ora bo tin partidonan ‘do-or-die’ den kual bo mester usa bo intuishon. Den hasi esaki ta bini kambio den e aliniashon pa duna sierto hungadó mas espasio pa sinti konfortabel ku e line up. Tambe pa e otro hungadónan por haña un chèns. E kambio aki a resultá nos bon den e partido mas resien.”