KOREA — Selekshon di Reino ta pasa pa siguiente buèlta despues di a gana Chinese Taipei ku skor di 6-5. Ku e viktoria aki e selekshon di Reino a logra su di dos viktoria den e Klásiko Mundial di Beisbòl 2017.
Tabata e mesun Jurickson Profar(4-1) ku e dia promé a empuha e promé karedanan pa e selekshon di Reino, awe ta empuha e kareda di viktoria. Den di nuebe entrada Jurickson Profar a logra un base por bola ku ku base yen pa empuha Dwayne Kemp ku a drenta komo koredó emergente pa Dashenko Ricardo(4-2).
Resumen di e partido, kortesia di MLB.com
Dashenko Ricardo a habri e markadó pa selekshon di Reino den bòm di dos entrada ku un single ku ta empuha Didi Gregorius(4-3). E bentaha di 1-0 aki no a dura masha i den kabes di tres entrada Taipei ta anotá dos pa bai ariba 2-1.
Den di kuater entrada Didi ta konektá un doblete pa empuha Wladimir Balentien(4-4) i Jonathan Schoop(4-1) i manda Reino bek ariba 3-2. Despues tabata Dashenko ku un biaha mas ta konektá un single pa empuha Gregorius i amplia e bentaha.
Kontrali na e partido anterior e picheo di Reino no por a wanta e bentaha i un biaha mas Tapei ta bai ariba den di sinku. Akinan e asiátikonan ta anotá tres kareda kontra e picheo di Reino pa 5-4.
Den di ocho entrada Didi ta konektá otro doblete, e biaha aki e ta empuha Xander Bogaerts() pa empatá e partido na sinku.
E partido ta drenta bòm di nuebe entrada na un empate. Pero akinan e selekshon di Reino ta logra yena base i logra e viktoria riba un base por bola di Jurickson Profar.
Pa e selekshon di Reino Jair Jurrjens a habri riba montikulo pichando tres entrada i permitiendo dos kareda riba tres hit i tres base por bola miéntras ku ela poncha 4.
Shairon Martis a picha e último entrada perfekto pa e selekshon di Reino i logra e viktoria. Ku e viktoria aki e selekshon di Reino ta pasa pa e dos buèlta di Klásiko Mundial di Beisbòl.
Ainda e selekshon tin ku enfrentá Israel awe nochi 11’or ora lokal di Korsou. Ganadó di e partido aki lo gana Grupo A tambe, sin embargo ámbos ekipo a pasa pa e dos buèlta na Tokyo, Hapon. Pa e selekshon di Reino Rob Cordemans ta riba montikulo i e lo enfrentá Jason Marquis di Israel.