WILLEMSTAD — Manera ya ta konosí e gran apertura di Liga MCB Promé Divishon lo tuma lugá djadumingu, 5 di febrüari benidero den Stadion Antoine Maduro (SUBT) 6’or di atardi.
E dos ekiponan ku lo mira akshon den e gran apertura di Liga MCB Promé Divishon lo ta e ekipo kampion di Liga MCB Promé Divishon 2016, Centro Dominguito i e ekipo di Inter Willemstad ku a promové di Liga MCB Segundo Divishon pa Liga MCB Promé Divishon.
E aña aki Liga MCB ta wòrdu dediká na e siguiente baluartenan;
- Rumannan Maria (Edsel, Maurits, Raymond)
- Ronald Trouwloon
- Harry Davelaar
- Vero Janzen
E persona nan aki ta tin un kontribushon enorme na e desaroyo di e deporte rei, futbòl.
P’esei nan lo wòrdu homenagiá i FFK lo dediká e kampionato di e aña aki na nan.
Promé ku e gran apertura aki lo bai tin un partido hubenil kaminda SUBT lo enfrentá Centro Barber U-20 pa despues kontinuá ku e partido di Liga MCB Promé Divishon.
Porta nan lo ta habri for di 3’or di atardi i karchinan lo ta optenibel na lokèt di SUBT promé ku wega. E entrada pa e wega di apertura ta kosta 10 florin pa adulto miéntras mucha te ku 12 aña i 60+ ta kosta fl.5,- i animashon musikal lo ta na enkargo di un DJ.
E partidonan di Liga MCB Promé Divishon lo tuma lugá den Stadion Antoine Maduro (SUBT). Mayoria wega ta wòrdu hungá den wikènt esta, djabièrnè, djasabra i djadumingu pero lo bai tin tambe algun partido ku lo kai den siman.
Preis pa kampionato regular ta 6 florin general i 60+ i mucha te ku 12 aña ta kosta fl.2.50.
E ekiponan ku lo partisipá na Liga MCB Promé Divishon ta lo siguiente:
- Centro Dominguito
- Scherpenheuvel
- Centro Barber
- Jong Holland
- Undeba
- Vesta
- Hubentut Fortuna
- Victory Boys
- SUBT
- Inter Willemstad
Liga MCB Promé Divishon lo wòrdu hunga di e siguiente manera;
E promé fase lo konsistí di dos buèlta regular den kua kada ekipo ta enfrentá otro na dos okashon ku ta suma un total di 90 wega. Den e segundo fase (buèlta di 6),e promé 6 ekiponan despues di e buèlta nan regular ta klasifiká pa e play off entre di seis klup den kua kada ekipo ta enfrentá otro na un okashon ku ta lo suma un total di 15 wega. Den e terser fase (buèlta di 4), e promé kuater ekiponan den e play off di 6 klup ta klasifiká pa sigui den e play off entre di 4 klup den kua kada ekipo ta enfrentá otro na un okashon ku ta un total di 6 wega i den delaster fase (final), e dos promé ekiponan den e play off di 4 klup ta klasifiká pa e wega final di e kampionato pa mira kua ta titulá kampion di Liga MCB Promé Divishon.
Liga MCB Segundo Divishon ta inisiá 13 di febrüari benidero ku 2 tremendo partido na tereno di FFK. E promé enkuentro lo ta entre De Koning ku Sta Cruz 7’or di anochi i despues Indekor lo enfrentá Marquita 9’or di anochi. Tur partido di Liga MCB Segundo Divishon lo tuma lugá na tereno di FFK i e partidonan aki ta kosta solamente fl.2,- pa persona.
E sistema di kampionato ta keda hungá mesun kos ku esun di Promé Divishon.
E ekiponan ku ta partisipá na Liga MCB Segundo Divishon ta lo siguiente:
- Jong Colombia
- Atomic
- Mahuma
- Sithoc
- U.D. Tera Kòrá
- Sta. Cruz
- Indekor
- New Song
- Marquita
- De Koning
E aña aki direktiva di FFK a introdusí un premio den forma di sèn kèsh pa e ekiponan kampion i supkampion di Liga MCB Promé, Segundo i tambe Terser Divishon. E premio ta konsistí di un suma di fl. 3000 pa Liga MCB Promé Divishon, fl.1500 pa Liga MCB Segundo divishon i fl.750,- pa Liga MCB Terser Divishon. Esaki lo wòrdu repartí di e siguiente forma; 2/3 parti lo ta e ekipo kampion I 1/3 parti lo ta e ekipo supkampion.
Un yamada ta bai na henter e pueblo di Kòrsou pa asistí na e gran apertura di Liga MCB Promé i Segundo Divishon ku ta ranka sali djadumingu, 5 di febrüari próksimo, miéntras Liga MCB Segundo Divishon lo inisiá 13 di febrüari. Bin pasa un ratu ameno den kompania di bo famia i disfrutá di bo deporte preferí e deporte rei, futbòl!