WILLEMSTAD — Torneo 100 aña MCB a drenta den simannan kulminante ku playoffnan final pa asina determiná kua ta e ekiponan ku lo batayá den final pa e título kampion di e torneo aki. Manera ya ta konosí, Torneo 100 aña MCB a ranka sali dia 24 di sèptèmber den kategoria Junior (13-15 aña) i Senior (16-18 aña). E torneo aki a ser hunga aña pasa bou di e nòmber RBI Curaçao i e aña aki a djòin e selebrashon di e spònser prinsipal MCB i a yama esaki Torneo 100 aña MCB.
Ekiponan di Junior league a hunga no mas ku 16 wega pa yega na e posishonnan final kaminda ta determiná ken lo hunga kontra ken den e playoff dal saka. Djadumingu último e playoff aki a kuminsá den divishon Junior i meskos ku aña pasa e ekipo ku a kaba na promé lugá den e buèlta regular a sa di gana su partido i pasa pa final. E aña aki esaki ta e ekipo di St. Maria ku awor ta sinta warda ken nan lo bai topa den final.
E kampion di aña pasa, Sta. Rosa, no a logra sobrebibí e promé wega di eliminatorio i a haña un pasashi pa bai kas despues di un derota kontra e ekipo di Brievengat ku ta esun ku lo bai purba di sali for di abou i bin gana e título. E sub kampionnan di aña pasa, Van Engelen, tambe mester a baha kabes pa e ekipo di Marchena ku aña pasa tambe a hunga un bon rònt eliminatorio i logra keda den e delaster tres nan. Montaña Abou tambe a sa di gana nan partido kontra St. Michiel ku tabata e debutantenan den e torneo di e aña aki.
E partidonan di Junior lo kontinuá djadumingu awor pero promé ku esaki lo bai haña djasabra e rònt eliminatorio di Senior. E partidonan programá ta:
8:30 Montaña Ariba vs. St. Michiel
10:45 Sta. Rosa vs. Brievengat
13:00 Van Engelen vs. Marchena
15:15 Ganadó 1 vs. Ganadó 2
E ganadó di e partido di 1or ta pasa mesora pa e gran final miéntras ku e pèrdèdó ta haña un chèns pa hunga bini bek.
Tantu e final di Junior komo di Senior lo ta un Best of three i tur dos ta kuminsá Djabièrnè 16 di desèmber i kaba djasabra dia 17.
Curaçao Baseball Week
E aña aki atrobe a forma All Star Game for di e ekiponan partisipante den Torneo 100 aña MCB i esakinan a midi forsa ku otro den e Curacao Baseball Week hungando Junior (djaweps) i Senior (djabièrnè). Tabata dos tremendo partido di nivel ku públiko por a disfrutá.
Durante di e partidonan aki tambe a hasi entrega di premio na e kampion pitcher i kampion bate di e respektivo divishonnan. Den Junior e kampion bate a resultá Nazir Rog di e ekipo di Sta. Maria i e kampion picher Cliyano Nahr di e ekipo di Montaña Abou. E premionan a ser entrega dor di Sr. Gino Valeriaan di MCB.
Den Senior e kampion bate a resultá Alex Henrietta di Van Engelen i e kampion picher Siamani Boekhoudt di Sta. Rosa. E premionan a ser entrega pa Dr. Jacobus di Fundashon Pa Nan.
For di aki e komishon organisadó kier a yama tur ekipo ku a partisipá danki pa nan partisipashon i deportivismo durante di e temporada 2016 den e Torneo 100 aña MCB. Tambe un danki na Sr. Hensley Meulens ku atrobe a koperá en grande ku bala pa e torneo por a drai. Naturalmente no por laga nos spònser prinsipal, Maduro & Curiel’s Bank afó i no tin nada mas ku apresio i elogio pa nan kontribushon. For di e promé dia MCB tabata para kla pa yuda i no a duda niun momentu pa yuda e komishon organisadó realisá e torneo ku ta drentando su parti final.
Un invitashon ta bai na pueblo di Kòrsou pa bin presensia nos futuro streanan den akshon e dos wikènt benidero aki. Pa informashon aktual por siguí nos tambe riba nos pagina di Facebook: rbicuracao i e weganan riba Gamechanger.