WILLEMSTAD — E selekshon nashonal di dama U-15 ketu bai sakando kara di Kòrsou aya na Orlando den e kampionato di dama kategoria U-15 di CONCACAF.
E selekshon a logra su terser viktoria i klasifiká pa kuart final.
Manera ya ta konosí e selekshon nashonal di dama U-15 ta na Orlando pa partisipá na e kampionato di dama kategoria U-15 di CONCACAF.
Durante e promé enkuentro, e selekshon a gana Anguilla ku skor di 3-0 ku golnan anotá pa Staygin Stephens i Lindsey Hart (2). Djasabra último e selekshon a logra su segundo viktoria, ganando di U.S.Virgin Islands ku e skor di 6-0. E golnan a keda anotá pa Staygin Stephens na di 36 minüt di e partido miéntras Riesmarly Tokaay a anotá 2 gol na di 6 i 50 minüt i Lindsey Hart a anotá e 3 otro golnan na di 13, 63 i 65 minüt di e partido aki.
Awe atrobe e damanan a sa di gana di Barbados ku e skor di 3-0 i a klasifiká pa e kuart final ku lo tuma lugá djárason próksimo. E golnan a keda anotá pa Staygin Stephens na di 3 minüt i Jathsury Rosa tabata esun ku a anotá e 2 otro golnan na di 36 ku di 60 minüt di e partido aki.
Ku e resultadonan aki e selekshon nashonal di dama U-15 ta klasifiká pa e segundo buèlta i tin ku bai enfrentá e ekipo ku klasifiká komo number 1 di pul B. Pul B ta konsistí di e siguiente paisnan: Canada, Costa Rica, Venensuela, Jamaica I El Salvador.
Skema di e partido di kuart final:
17 Augustus 2016 kontra e ekipo Nr. 1 di pul B na ESPN Wide World of Sports Complex.