WILLEMSTAD — E seis hobennan ku a resulta ganador den e Curacao Baseball Week (CBW) di 2015, lo ta presente Djaluna awor den stadion di Marlins di Miami, pa presensia e wega di e ekipo aki ku Giants di San Francisco. Durante di e siman di baseball nan tabata esnan ku mas tantu a destake den tur aspekto. Nan ta Givian Sirvania, Deshandro Tromp, Jurrangelo Cijntje, Randy Nicia, Michelson Danchi i Riorden Windster. E ultimo aki ta na Easley, Nort Carolina, ku e ekipo di Big League di Korsou pa e Serie Mundial. E gran homber di nos beisbol, Hensley Meulens (San Francisco Giants), Ben Thijssen (coach) i Steve Janssen, Coach di e selekshon nashonal hulandes a hasi e eskogo di e hobennan aki.
MLB
Djadomingu 7 di Augustus proksimo ta e dia ku e talentonan aki lo biaha pa Miami, akompañá pa nan mayor. Huntu ku nan lo biaha e organisashon di Curacao Baseball Week i bosero di evento, Gonzalo Cuales. Tambe lo biaha ku e delehashon kuater persona ku a “kumpra” e biahe aki durante di e sena i vindishi orgamnisa den kuadro di e siman grandi di beisbol. Ta hustamente e loke nan a paga pa loke nan a kumpra den e vindishi, ta hasi e biahe aki posibel, . E loke a kumpra durante di 2014 tabata riba enkargo di Andrelton Simmons. Riba su invitashon Erwinja I Pe.Son Revierre ta biaha ku e delegashon.
Despues di e vuelo ku partner di CBW Insel Air, e delegashon lo keda transporta pa hotel ku sobra di e dia liber. Djaluna atardi mitar di sinku, Marlins di Miami lo ta pendiente pa risibi e delegashon curasoleño. Prome ku e wega di Giants vs Marlins, e delegashon lo hasi un rekorido den e stadion di Marlins i naturalmente e delegashon lo keda risibi ku brasa habri pa e ko-organisado di CBW i Coach di bateo di San Francisco, Hensley “Bam Bam” Meulens”.
Djamars mainta e delegashon lo tin tempu ainda pa komenta e gran eksperensia ku nan a pasa aden estando asina serka di e loke un ekipo di beisbol di Liga Grandi ta” kome i bebe”. E mesun merdia ey, e delegashon ta bula ku Insel Air pa regresa Korsou. Naturalmente e hobennan aki lo tin e konosementu di kon un ke otro ta tuma lugar den Liga Grandi, loke sigur lo por kontribui pa nan aspira un karera komo pelotero den futuro.