WILLEMSTAD — Resientemente, komo parti di e programa edukativo di FFK, a tuma lugá e kurso ‘World Coaches’ den kooperashon ku KNVB pa entrenadónan hubenil di kategoria U-15. Errol ‘Joy’ St. Jago i Etiënne Siliee, ámbos instruktornan di KNVB tabata esnan ku tabata enkargá pa duna e kurso aki .
E kurso a kuminsá djaluna 18 di yüli i a terminá djabièrnè 22 di yüli, pues e ta tin un durashon di 5 dia.
E tópikonan ku a keda trata durante e kurso aki tabata prinsipionan di futbòl moderno ku ta importante den desaroyo di hóben nan di kategoria U-15.
E kategoria aki ta un edat spesífiko importante pa siña e hóben nan e prinsipionan básiko di táktika kolektivo di ataká i defende. Tambe e kurso a kubri e área di liderato ku ta kubri tur e aspektonan ku ta influensia e parti di e formashon di e hóben nan ku ta práktika e deporte di futbòl. E ambiente i faktornan eksterno tin un influensia grandi riba e proseso di formashon di e hóben nan aki i komo entrenadó bo mester sa tur e metodonan i instrument nan di kon bo ta dil ku e desafionan aki.
E kurso a ser repartí den 2 parti. E promé parti tabata esun teorétiko i despues a tuma lugá e segundo parti kual tabata esun práktiko didáktiko ku a konta ku diferente hóbennan di kategoria U-15 ku a bin pa asistí durante e kurso nan. Na final di e kurso e kursistanan a wòrdu repartíden diferente grupo i mester a hasi un presentashon di tur loke nan a haña durante e kurso aki.
E kurso aki tabata supsidiá pa FFK i KNVB i a konta ku partisipashon di 28 persona ku 2 ‘stagaire’ di Hulanda ku a kab’é ku éksito i a haña nan sertifikado di KNVB. Awó nos por bisa ku e famia di futbòl ta konta ku 30 entrenadó hubenil mas.
FFK ta hasi un apelashon na e kursistanan ku no ta pertenesé na un klup ainda, pa djòin un klup di FFK pa yuda desaroyá i engrandesé e deporte di futbòl!