WILLEMSTAD — Manera ya ta konosí nos selekshon nashonal a klasifiká pa e segundo buèlta di Scotiabank Caribbean Cup i preparashonnan a kuminsá pa loke ta trata e 2 kompromisonan di nos selekshon nashonal.
Nos promé partido lo ta kontra Guyana Inglés djárason, promé di yüni miéntras djamars 7 di yüni nos lo enfrentá U.S. Virgin Islands. Ámbos partido lo tuma lugá aki na Kòrsou den Stadion Ergilio Hato (SDK) pa 8or di anochi.
Aki ta sigui un biografia chikí di e hungadó nobo di nos selekshon nashonal.
Nòmber: Irvingly van Eijma
Fecha di nasementu: 9 febrüari 1994
Ekipo: FC Oss
Posishon: Atakante
Irvingly van Eijma ta un hóben futbolista nase na Hulanda (Tilburg) dia 9 di febrüari 1994. Su posishon preferí ta medio kampo i for di yüni 2015 e ta militá den e ekipo amatùr FC Oss despues ku nan a tume for di e ekipo RKTVV.
Irvingly tabata militá den e ekipo hubenil FC Den Bosch te ku aña 2014 despues di a bai un ekipo deskonosí di Cyprus. Un aña despues ela bolbe bèk Hulanda i ela militá den e ekipo amatùr RKTVV. Ku e ekipo aki ela hunga durante 4 luna den segundo divishon i despues ela pasa pa FC Oss. E ekipo aki a kaba komo number 9 den e temporada anterior den promé divishon. Irvingly a hasi su debut riba 7 di ougùstùs den e partido kontra Fc Emmen.
Tambe Irvingly a representá Kòrsou den U-20 durante e weganan di kualifikashon di CONCACAF U-20 na aña 2013. Esaki ta un biografia chikí di e hungadó nobo di nos selekshon nashonal ku ta kla pa enfrentá Guyana Inglés djárason promé di yüni próksimo.
Karchinan pa e 2 partidonan aki ya ta na benta i ta optenibel na FFK bou di ora di ofisina, Botika Mampuritu, Beep Beep, 4th of July Snèk na Barber, pòmp di gasolin Santa Maria i na tur filial di C-Post N.V.
E preisnan pa e diferente paketenan (di ámbos partido) pa sekshonnan ta lo siguiente:
- VIP ta kosta Fl.300,- (inkluso konsumo);
- Bou di tribuna kubrí ta Fl.75,-
- Bou di tribuna kubrí parti Festival Center ta Fl.50,-
- Tribuna no kubrí ta Fl.30,-
- Den e sekshon di tribuna no kubrí mucha te ku 12 aña i 60+ ta paga Fl.20,-
Tene na kuenta ku e preisnan aki ta válido pa ámbos partido, pues bo ta kumpra un pakete di karchi pa tur e 2 partidonan aki!
Ainda tin mas suèter di nos selekshon nashonal ku shal optenibel na FFK bou di ora di ofisina na balor di 35 ku 25 florin. Pasa buska di bo pa asina bo bin sostené i apoyá nos hungadónan.
Reservá djárason dia promé di yüni i djamars 7 di yüni pa bo ta den stadion Ergilio Hato komo e number 12 sosteniendo nos selekshon nashonal.