WILLEMSTAD — Segun informashonnan e selekshon di futbòl di Kòrsou ku ta partisipando den Kopa Karibe lo hunga un partido amistoso kontra di un selekshon lokal di Kòrsou. E informashon aki no ta konfirmá ainda pa Federashon Futbòl Kòrsou, pero segun un fuente ku ta na altura a bisa ku e partido lo tuma lugá di kuater di yüni próksimo den Stadion Ergilio Hato. E selekshon lokal di Kòrsou lo keda dirigí pa Norman ‘Nooi’ Girigorie.
Manera ya ta konosí nos selekshon nashonal a klasifiká pa e segundo buèlta di Scotiabank Caribbean Cup. Konsekuentemente banda di e partido amistoso aki e selekshon di Kòrsou lo hunga dos otro partido na Kòrsou. Djárason promé di yüni lo tin e partido entre Guyana Ingles den Stadion Ergilio Hato, miéntras ku djamars 7 di yüni nos lo enfrentá U.S. Virgin Islands. Ámbos partido lo tuma lugá 8’or di anochi.