Patrick Kluivert ta dispidí di Selekshon Nashonal di Kòrsou ku dos partido na Kòrsou

WILLEMSTAD — Manera ya ta konosí nos selekshon nashonal a klasifiká pa e siguiente buèlta di Caribbean Cup 2016. Esaki  despues di a pèrdè ku e skor di 1-0 kontra Barbados i a gana Sto.Domingo ku e skor di 2-1.

Despues di un sorteo ku a tuma lugá na aprel último, a bira konosí ku U.S. Virgin Island i Guyana Ingles lo bai ta e dos ekiponan ku nos lo enfrentá na yüni próksimo den e siguiente buèlta di Caribbean Cup.

Den promé instante nos mester a enfrentá Guyana dia promé di yüni aya na Guyana den National Stadium Providence i enfrentá U.S Virgin Island kuater di yüni aki na Kòrsou den Stadion Ergilio Hato. Ta asina Guyana a hasi un petishon na FFK pa e partido aki tuma lugá aki na Kòrsou debí ku nan stadion lo ta okupá ku weganan internashonal di ‘cricket’.

FFK a bai di akuerdo i ta ofisial ku ámbos partido lo tuma lugá aki na Kòrsou dianan promé i shete di yüni próksimo den Stadion Ergilio Hato. Pues awor, en bes di un, nos lo bai disfrutá di dos tremendo partido di nos selekshon nashonal kontra Guyana Ingles djárason, promé di yüni miéntras djamars shete di yüni nos lo enfrentá U.S. Virgin Island.

Nos hungadónan di Hulanda lo yega Kòrsou den e wikènt di 27 di mei pa asina djòin nos hungadónan lokal i kuminsá ku e training nan pa nos dos kompromisonan den e segundo buèlta di Caribbean Cup 2016.

Nos ‘head coach’ Sr. Patrick Kluivert a avisá for di aña pasa ku den futuro e lo ke bira direktor tékniko di un ekipo pa e por ta tur dia riba tereno di wega. P’esei ela yega na un akuerdo ku Ajax ku ta drenta na vigor na yüli 2016. E lo ta na kabes di nos selekshon nashonal pa último bia dianan promé ku shete di yüni próksimo pa e dos partidonan aki. Despues elo despedí pero lo keda ku relashon ku nos selekshon, FFK i Kòrsou.

Pronto nos lo duna mas informashon di e dos partidonan aki i lo kuminsá ku benta di karchi.

Ainda tin mas suèter di nos selekshon nashonal ku shal optenibel na FFK bou di ora di ofisina na balor di 35 ku 25 florin. Pasa buska di bo pa asina bo bin sostené i apoyá nos hungadónan. Reservá djárason dia promé di yüni i djamars shete di yüni pa bo ta den stadion Ergilio Hato komo e number 12 sosteniendo nos selekshon nashonal.