WILLEMSTAD — Despues di un tremendo Kampionato aña pasa, FFK i MCB ta anunsiá e gran apertura di Liga MCB Promé Divishon ku ta tuma lugá djadumingu, 17 di aprel binidero den Stadion Antoine Maduro (SUBT) 6or di atardi.
E dos ekiponan ku lo mira akshon den e gran apertura di Liga MCB Promé Divishon lo ta e ekipo kampion di Liga MCB Promé Divishon 2015, Centro Dominguito i e ekipo di Jong Colombia.
E aña aki Liga MCB ta wòrdu dediká na e siguiente baluartenan; Sr. Ruben Brandborg (eks hungadó), Sr. Edgar Meulens (eks hungadó), Wilbert Martijn (eks hungadó), Sr. Keneth Brigitha (rèfri) i Sr. Erwin Rekondi (eks dirigente). E persona nan aki ta tin un kontribushon enorme na e desaroyo di e deporte rei, futbòl. P’esei nan lo wòrdu homenahiá i FFK lo dediká e kampionato di e aña aki na nan.
Porta nan lo ta habri for di mitar di 4 di atardi i karchinan lo ta optenibel na lokètnan di SUBT promé ku wega. E entrada pa e wega di apertura ta kosta 10 florin pa adulto miéntras mucha te ku 12 aña i 60+ ta kosta fl.5,-. Animashon musikal lo ta na enkargo di un DJ.
Promé ku e gran apertura di Liga MCB Promé Divishon, lo tin un partido di dama entre SUBT i Hubentut Fortuna 4or di atardi.
E partidonan di Liga MCB Promé Divishon lo tuma lugá den Stadion Stadion Ergilio Hato (SDK) i den Stadion Antoine Maduro (SUBT). Weganan ta wòrdu hunga den wikènt esta, djabièrnè, djasabra i djadumingu. Na momento ku un wega keda kanselá lo reprogramá e wega aki durante di siman. E parti di seguridat ta den man di CVD, Cops i Kuerpo Polisial i tur e weganan lo wòrdu dirigí pa árbitronan afiliá na FFK.
Preis pa kampionato regular ta 6 florin general i 60+ ku mucha te ku 12 aña ta kosta fl.2.50.
E ekiponan ku lo partisipá na Liga MCB Promé Divishon ta lo siguiente:
- Centro Dominguito
- CSD Barber
- Hubentud Fortuna
- Victory Boys
- Undeba
- Jong Holland
- Scherpenheuvel
- SUBT
- Jong Colombia
- Vesta
Liga MCB Promé Divishon lo wòrdu hunga di e siguiente manera;
E promé fase lo konsistí di dos buèlta regular den kua kada ekipo ta enfrentá otro na dos okashon ku ta suma un total di 90 wega. Den e segundo fase (buèlta di 6),e promé 6 ekiponan despues di e buèlta nan regular ta klasifiká pa e play off entre di seis klup den kua kada ekipo ta enfrentá otro na un okashon ku ta lo suma un total di 15 wega. Den e terser fase (buèlta di 4), e promé kuater ekiponan den e play off di 6 klup ta klasifiká pa sigui den e play off entre di 4 klup den kua kada ekipo ta enfrentá otro na un okashon ku ta un total di 6 wega i den e delaster fase (Final), e dos promé ekiponan den e play off di 4 klup ta klasifiká pa e wega final di e kampionato pa mira ken ta titulá nan mes kampion di Liga MCB Promé Divishon.
Konforme e desishon di reunion general e sistema di promoshon/degradashon pa e kampionato aki ta keda vigente.
Pues e ekipo nr. 10 di Liga MCB Promé Divishon ta hunga dos partido promoshon/degradashon ku e ekipo Kampion nr. 1 di Liga MCB Segundo Divishon.
Liga MCB Segundo Divishon ta kuminsá djaluna dia 18 di aprel 2016. E promé partido di Liga MCB Segundo Divishon ta tuma lugá na tereno di FFK mitar di 8 di anochi i e partido aki lo ta entre e ekipo di Fc.Sithoc ku Indekor.
E ekiponan ku ta partisipá na Liga MCB Segundo Divishon ta lo siguiente:
- Fc Sithoc
- Inter Willemstad
- U.D. Tera Kòrá
- Marquita
- C.H. Mahuma
- Indekor
- De Koning
- New Song
- Sta Cruz
- Atomic
E kampionato di Segundo Divishon ta wòrdu hunga manera esun di Promé Divishon i entrada pa e partidonan aki lo ta grátis.
Un yamada ta bai na hinter e pueblo di Kòrsou pa asistí na e gran apertura di Liga MCB Promé i Segundo Divishon ku ta ranka sali 17 i 18 di aprel próksimo. Bin pasa un ratu ameno den kompania di bo famia i disfrutá di bo deporte preferí e deporte rei, futbòl!