WILLEMSTAD — ?Djasabra mainta un total di 28 coach lokal a pasa e kurso di Major League Baseball, Coach Development Program ku éksito. Baseball di Kòrsou ta riku na 28 coach ku awor por bai kompartí nan eksperensia i nan konosementu nobo ku nan kolega coachnan di nan respektivo organisashonnan i naturalmente ku e propio hóben peloteronan.
Durante e akto di seremonia algun di nos coachnan i tambe e representantenan di MLB a hiba palabra ku diskurso elokuente i asta na algun momentu emoshonal. E liña kòrá ku a kore durante henter e seremonia aki ta e apresio ku kada grupo tabatin pa otro. Tantu e studiantenan (coach nan lokal) komo e instruktornan di MLB tabatin hopi palabra di elogio pa otro.
Sin duda e 28 coachnan lokal ku a partisipá na e programa aki, ouspisiá pa Curaçao Baseball Development Foundation den koperashon ku MLB, a saka kara di beisbòl di Kòrsou. Esaki lo bai habri oportunidatnan i tambe inisiativanan nobo tantu di parti e propio coachnan pero tambe CBDF i MLB.?Tur e 28 coachnan ku a inisiá e programa a bin finalisá esaki tambe i mester duna nan krédito pa esaki pa nan keda ocho dia na hotèl i sakrifiká famia, kas, trabou i tambe vèlt.
Major League Baseball ta sigui kere den Kòrsou i a demonstrá esaki atrobe invitado dos hóben prospekto pa partisipá na un showcase pa hungadónan eligibel na Panama e siman aki. Na mes momentu MLB a manda un karta di invitashon pa CBDF, pa wak si tin interes di coachnan lokal pa por biaha pa Sto. Domingo i keda máksimo un luna òf mínimo dos siman den un kampamentu di un organisashon di Liga Grandi. Coachnan ku ta interesá por tuma kontakto ku kualke miembro di CBDF. Riba tèrmino largu MLB tin algun plan sumamente interesante den tapara pa beisbòl di Kòrsou. E alegria i entusiasmo ku a reina djasabra na Holiday Beach Hotel i ambiente di kolegialidat por ta un paso pa un futuro nobo pa e deporte aki. Henry Rodriquez e hefe di MLB a finalisá su diskurso usando un frase di Socrates ku ta pas den e konteksto aki masha bon, “e sekreto di kambio ta pa enfoká tur bo energia no pa bringa lo pasado pero konstruí riba futuro.”