Leandro Bacuna i Jarchinio Antonia dos di e karanan nobo den Selekshon Nashonal

WILLEMSTAD — Manera ya ta konosí nos selekshon nashonal lo tin ku enfrentá Barbados i Repúblika Dominikana den e promé buèlta di e weganan pa eliminatorio pa Caribbean Cup 2017. E promé partido lo tuma lugá aya na Barbados 8’or pm dia 23 di mart den stadion Usain Bolt Sport Complex miéntras e segundo partido lo tuma lugá aki na Kòrsou dia 26 di mart próksimo, 6:30pm den Stadion Ergilio Hato (SDK).

Nos selekshon nashonal ta konta ku 5 hungadó nobo ku a bin pa reforsá nos selekshon. Aki ta sigui un biografia chikí di algun di e hungadónan aki.

Ken ta Leandro Bacuna? 

Leandro Bacuna ta un hóben futbolista prominente di Hulanda ku mayornan antiano. Ela nase 21 di ougùstùs di aña 1991 na Hulanda (Groningen). Aktualmente e ta militá den e ekipo ingles Aston Villa komo defensa riba ala robes i medio kampo. Leandro Bacuna a wòrdu skohe 20 bia pa representá Hulanda i Antia den diferente selekshon hubenil.

Dia 30 di òktober 2009, Bacuna a hasi su debut den FC Groningen den e divishon máksimo den un partido kontra PSV Eindhoven. Bacuna a militá den e ekiponan hubenil di Groningen tambe. Riba 6 di Novèmber 2009, Bacuna a anotá su promé gol den un partido kontra Heracles Almelo. E partido a finalisá ku e skor di 4-1 na fabor di FC Groningen.

Riba 13 di yüni 2013 a keda anunsiá ku Bacuna a firma un kontrakt di 3 aña ku e ekipo di Anston Villa, un ekipo ingles di ‘Premier League’. Bacuna a haña e number 7 i a impreshoná hopi ora ela debutá ku e ekipo Anston Villa, aunke e tabata hunga na un otro posishon di kual e sa kustumbrá hunga.

Bacuna a anotá su promé gol ku Aston Villa dia 28 di sèptèmbèr na Manchester City. Asina ei Leandro a siguí skor den diferente partido i riba 20 di ougùstùs 2015, ela firma un kontrakt ku e ekipo aki pa un periodo mas largu. Awor, Leandro Bacuna tambe ta forma parti di nos selekshon nashonal den e promé buèlta di e Caribbean Cup.

Ken ta Jarchinio Antonia? 

Jarchinio Antonia ta nasé na Hulanda (Amsterdam) riba 27 di dezèmber 1990. E hóben futbolista di 25 aña a firma un kontrakt di 3 aña na yüni 2014 ku e klup FC Groningen, ku a kumpr’é for di e klup Go Ahead Angels. E posishon ku e ta hunga ta atakante.

Antonia a hasi su debut den e divishon di honor dia 12 di sèptèmber 2010 den un partido kontra Graafschap. Promé ku ela militá den ADO Den Haag ela hunga den Ajax i Zeeburgia hubenil.

Na yanüari 2011 ela haña chèns di kaba e kampionato ku e ekipo Go Ahead Angels i riba promé di aprel 2011 ela firma kontrakt pa 2 temporada ku chèns ainda pa por hunga pa Go Ahead Angels.

Na 2014 ela hasi su traspaso pa e ekipo FC Groningen. Ela firma un kontrakt te ku aña 2017. Ku FC Groningen ela gana e KNVB beker na 2014/2015. Durante e partido final ela sòru di asistí den tur e 2 golnan ku a keda anotá di kual su klup a gana ku e skor di 2-0.

Jarchinio Antonia tambe a djòin nos selekshon i ta kla pa enfrentá Barbados ku Repúblika Dominikana den e promé buèlta di Caribbean Cup.

Karchinan ya ta na benta i e preisnan pa e diferente sekshonnan ta lo siguiente:

  • VIP ta kosta Fl. 250,-  (inkluso konsumo);
  • Bou di tribuna kubrí ta Fl. 50,-
  • Bou di tribuna kubrí parti Festival Center ta Fl. 35,-
  • Tribuna no kubrí ta Fl. 25,-
  • Den e sekshon di tribuna no kubrí mucha te ku 12 aña i 60+ ta paga Fl. 12.50

E karchinan ta optenibel na FFK bou di ora di ofisina, na Pòmp di gasolin Sta. Maria, Botika Mampuritu, Beep Beep, na 4th of July snèk na Barber i tur filial di C-Post N.V.

Pa abo ku ainda no tin bo flanèl i/òf shal di nos selekshon, pasa buska di bo na FFK bou di ora di ofisina na balor di fl.35,-. Ainda nos tin algun den stòk pa asina tur fanátiko por tin nan flanèl pa bin apoyá nos selekshon komo e number 12!