ESKOSIA — E internashonal di Kòrsou Kemy Agustien a yega na un akuerdo ku ekipo di futbòl Eskoses Hamilton Academical FC. E medio-kampista di 29 tabata sin ekipo e aña aki. Esaki despues ku su kontrakt a terminá ku e ekipo di Vendsyssel FF dia promé di yanüari último.
Agustien anteriormente tabata entrená ku e ekipo di Swansea City. Akinan Kemy ta entrená ku e di dos selekshon di e ekipo pero regularmente tambe ku hungadónan di e promé selekshon di Swansea City. Ultimo aki Kemy tabata riba un periodo di prueba ku e ekipo di Hamilton i a impreshoná hopi. Esaki a hiba na un oferta di e ekipo pa Kemy finalisá e temporada ku nan.
Kemy Agustien ta otro di e hungadónan ku a partisipá ku e selekshon di Kòrsou den e eliminatorionan pa Mundial Rusia 2018 ku lo ta bek huntu ku e selekshon den e eliminatorionan pa Kopa Karibe.
“Aktualmente mi ta sinti mi fit i kla pa hunga. Tempu nos a hunga kontra El Salvador mi no tabata fit, awor aki m’a entrená pues mi ta sinti mi bon i kla pa hunga,” Kemy a deklará algun siman pasa riba su presentashon ku e selekshon nashonal di Kòrsou.