OSLO — Segun informashonnan, e atakante di Kòrsou, Rihairo Meulens a yega na un akuerdo di un aña ku ekipo di Raufoss. Meulens for di yanüari di aña aki tabata sin ekipo pero resientemente e atakante di 27 aña tabata riba un periodo di prueba ku Raufoss. e ekipo di Raufoss ta den di dos divishon di futbòl na Noruega.
Aña pasa Rihairo pasa tempu ku e ekiponan di Rapid Bucharest na Romania i tambe ku e ekipo di Zira FK na Azerbeidjan.
Rihairo a keda konvoká na nuebe okashon pa e selekshon di Kòrsou i a anotá na tres okashon. Te ainda nos no a risibí informashon ku Meulens a keda konvoká pa e selekshon nashonal ku lo forma parti di e eliminatorionan pa Kopa Karibe 2017.