WILLEMSTAD — Defensa lateral di Helmond Sport, Gillian Justiana tambe a keda konvoka pa Patrick Kluivert pa e eliminatorionan pa Kopa Karibe 2017. Justiana ta uni su mes huntu ku Kemy Agustien i Jeremy de Nooijer komo e hungadónan ku nos a risibí konfirmashon di dje ku ya a partisipá ku e selekshon nashonal den pasado.
Justiana di 25 aña tin ocho aparishon ku e selekshon di Kòrsou i aktualmente tin 26 aparishon ku Helmond Sport kaminda e la sa di anotá na sinku okashon.
Den e promé buèlta di eliminatorio Kòrsou lo ta den Grupo 4 huntu ku Barbados i Repúblika Dominikana. Kòrsou lo enfrentá Barbados dia 22 di mart i Repúblika Dominikana dia 26 di mart. E dos mihonan di kada grupo ta avansá pa e siguiente buèlta.
Banda di Agustien i de Nooijer tin algun hungadó nobo ku a keda konvoká. Di esun nan ku nos por konfirmá kua risibí invitashon ta; Jarchinio Antonia, Doriano Kortstam, Rangelo Janga i Quentin Jakoba.
Di fuentenan no ofisial nos a komprendé ku Jakoba tabata den e pre-selekshon pero lo no ta forma parti di e selekshon definitivo. Tambe nos a tuma nota di algun otro nòmber pero ta wanta na publiká esaki te ora nos risibí konfirmashon i/òf informashon ofisial ku nos por verifiká. Federashon Futbòl Kòrsou no a hasi un publikashon ofisial di e hungadónan ku e keda konvoká ainda.