Bishita di KNVB na Kòrsou

WILLEMSTAD — Di 8 pa 10 di yanüari último, un delegashon di KNVB (Koninklijke Nederlandse Voetbal Bond), kual ta e federashon di futbòl di Hulanda, a bin hasi un bishita na Kòrsou. E delegashon tabata konsistí di Sr. Michael van Praag (presidente di KNVB), Sr. Gijsbert van Oostveen (sekretario di KNVB i direktor di e divishon di honor na Hulanda), Sr. Paul Decossaux (direktor komersial di KNVB) i Sr. Johan van Geijn kende ta esun enkargá ku asuntunan eksterior di KNVB.

E motibu di nan bishita tabata pa estrechá lasonan di koperashon entre FFK i KNVB pa loke ta trata e deporte di futbòl.

Durante nan bishita nan a reuní ku Minister Presidente di Kòrsou, Sr. Whiteman aya na fòrti i mas despues nan a reuní ku e direktiva di FFK. Tambe nan a bishita diferente vèlt rònt Kòrsou pa konstatá den ki situashon nan ta. A base di e diferente reunion i kòmbersashon nan aki nan a hasi un inventario riba e posibel problemanan ku por tin pa asina nan bin ku un konsepto nobo di un plan di koperashon entre FFK i KNVB. E plan aki lo keda presentá den e promé mitar di aña 2016.