WILLEMSTAD – Despues di e kolorido apertura ofisial djabièrnè último di MCB RBI 2015 tabatin un skema ful di wega djasabra i djadumingu na Tio Daou Ballpark. Sin duda e ekipo di Sta. Rosa Indians a konsolidá su mes na promé lugá den e aktual kampionato ku dos viktoria mas den fin di siman tras di lomba. Primeramente, Indians a gana Van Engelen Giants ku skor di 5-2 tras di pitcheo i bateo un biaha mas di Chris Koeiman. No solamente el a resultá e picher ganador pero a konektá un honron, su di tres temporada. Pa Giants, Jerrick Mathilda a resultá picher pèrdèdó i e mes a bai di 1-1 na bate. E di dos viktoria di Indians a bin kontra di Montaña Abou Rangers ganando ku skor di ?6-4. Picher ganador tabata Siamani Boekhoudt miéntras ku Jaeir Janzen a bai di 2-2. Pa Rangers picher pèrdèdó tabata Kevin Cecilia miéntras ku Ruendly Carolina a bai di 3-3 na bate.
Den otro resultadonan djasabra;
Van Engelen Giants a logra bòns bek mesora di nan promé derota djabièrnè ganando di Sta. Maria Pirates ku skor di 6-2. Picher ganador tabata Crisitien Josefina i e mes a bai di 2-2. Picher pèrdèdó tabata Giovanne Basilia i Steven Zimmerman a bai di 2-2 pa Pirates. Trai Seru Dodgers a logra un viktoria di 13-2 riba Marchena Reds. Picher ganador tabata Ceddanne Rafaela i Richgelon Juliana a bai di 2-2. Picher pèrdèdó tabata Frensley Leito i mihó bateador pa Reds tabata Kevin Leander di 3-2. E ekipo di Brievengat Orioles a logra nan promé viktoria di temporada ganando di Jandoret Braves ku skor di 12-5. Picher ganador tabata Quenci Philipsgous i mihó bateador tabata Gregory Alexander di 2-2. Picher pèrdèdó pa Braves tabata Denverick Martinus i mihó bateador Keiji Lourens di 2-2.
Djadumingu mainta e ekipo di Jandoret Braves tambe a logra nan promé viktoria di temporada ganando di Marchena Reds ku skor di 7-6. Picher ganador tabata Jhonattan Ferreira, Eljian Martina a bai di 3-2 na bate. Picher pèrdèdó tabata Kevin Leander i mihó bateador pa Braves tabata Gharrich Phelipa di 2-2. Seguidamente Trai Seru Dodgers a gana di Sta. Maria Pirates 9-5. Picher ganador tabata Raylison Bentura i mihó bate tabata Richgelon Juliana di 2-2. Picher pèrdèdó pa Pirates tabata Denzel Gregg miéntras ku Nazir Rog a bai di 2-2. Finalmente den e último wega di dia Montaña Abou Rangers a gana di Brievengat Orioles ku skor di 6-4. Picher ganador tabata Maidrickson Brunken i tabatin vários bateador ku a bai di 2-1. Picher pèrdèdó pa Orioles tabata Halim Rosalina i Gabriel van Lierop a bai di 1-1.
Djadumingu e Komishon di RBI 2015 a tuma un momentu pa duna Chairon Isenia un rekonosementu komo esun ku tabata e inisiador di RBI aki na Kòrsou. Miembro di e Komishon, Dennis Dambruck, a entreg’é un kamiseta di unifòrm di RBI 2015.
Pa haña un relato mas amplio i tambe sifranan di e weganan por bai riba rbicuracao.com i tambe Facebook. Kòrda ku semper por sigui e weganan bibu na kas riba kòmpiuter, laptop òf telefon via di gamechanger.com. Djis buska rbi curacao junior i por selektá bo ekipo faborito. Tur esaki ta posibel danki na e patrosinio di MCB i Refineria Isla.