WILLEMSTAD — Tabata un final meskos ku e aña anterior, sin embargo e resultado tabata diferente. E aña aki tabata e ekipo di Centro Dominguito ku a logra titulá kampion di Liga MCB den Stadion Ergilio Hato derotando Centro Barber ku skor di 4-2.
Despues di a yega a final di Liga MCB invikto e ekipo di Centro Dominguito no por a permití su mes su promé derota di temporada net den e partido final. Pues e ekipo a bin desisivo pa no solamente logra e viktoria pero tuma revancha riba e ekipo di Centro Barber ku aña pasa a titulá kampion riba nan kabes.
E ekipo di Centro Barber a sa di habri e markadó, pero no por a mantené e bentaha. Barber durante henter e kampaña 2015 a permití un kantidat respetá di gol kontra. Ayera esaki no tabata diferente dunando asina e ekipo di Centro Dominguito e oportunidat pa bin bek den e partido i finalmente logra e viktoria.
Pa Centro Dominguito e golnan a keda anotá pa, Norvianel Naar, Steward Sambo, un outo gol i por ultimo Lisandro Trinidad. E dos golnan di Centro Barber a keda anotá pa, Jurensley Martina i Geryon Albero.
Pa e ekipo di Dominguito esaki ta e di kuater biaha den nan historia ku nan ta logra e título máksimo. Centro Dominguito a logra e título pa promé biaha na aña 1987 i resientemente nan a logra esaki na añanan 2012 i 2013.