WILLEMSTAD — E dia a yega, Liga MCB Promé Divishon lo yega su final! Despues ku promé di mart 2015 Liga MCB a ranka sali i a mira akshon tur wikènt ku diferente tremendo partido, e gran final a yega. E 2 Centro nan lo bai enfrentá otro pa mira ken lo titulá nan mes komo e kampion di Liga MCB Promé Divishon 2015!
Kampion kontra Sup kampion, Banda Riba kontra Banda Bou, e aña aki historia ta bai ripití òf otro gai ta bai kanta? Bo no por keda afó!
Entrada adelantá pa e partido final aki lo ta fl.10 pa adulto miéntras ku mucha te ku 12 aña i 60+ ta paga fl.5. Entrada na porta ta bira fl.12.50 pa adulto i mucha ku 60+ ta keda fl.5.
Karchinan adelantá ta optenibel na:
* FFK (bou di ora di ofisina)
* Beep Beep Rio Canario
* 4th of July snèk na Barber
* Pòmp di gasolin Sta.Maria
* Radio Mas 99
* Dominguito Minimarket
* Braas San Lucas
* Kantor prinsipal di Robbie’s Lottery
Debí na asina tantu petishon FFK a habri espasio pa un sekshon di VIP. E sekshon aki ta kosta fl.75 ku konsumo inkluí. Karchinan pa e sekshon di VIP ta optenibel solamente na FFK bou di ora di ofisina.
Portanan di SDK lo ta habri for di 4or di atardi i animashon musikal lo ta na enkargo di Dolce Band! Tambe lo tin un partido amistoso 5pm entre nos selekshon kampion di U-15 ku lo enfrentá Jong Holland!
Kòrda ku djadumingu for di mitar di 10 di mainta karchinan ta optenibel na e lokèt di SDK miéntras ku bo por disfrutá di e partidonan di Liga Lito ku ta kontinuá e djadumingu aki for di 10or di mainta te den ora an di mèrdia riba tereno di FFK.
MCB i FFK ta invitá hinter pueblo di Kòrsou pa asistí na e partidónan aki i pasa un ratu ameno den kompania di bo famia i alabes disfrutá di un tremendo partido di futbòl, e gran final di Liga MCB Promé Divishon 2015!
Final Liga MCB Promé Divishon:
| Djadumingu | 25 okt. 15 | 19.00 | C. Dominguito | CSD Barber | SDK |