TEXAS — E ekipo di Texas Rangers a anunsiá ayera ku nan a aktivá Jurickson Profar for di e lista di hungadó inkapasitá di 60 dia. Profar a hunga mes ora ayera den Arizona Fall League ku e ekipo di Surprise Saguaros den Scottsdale Stadium kontra Scorpions.
Den e partido aki Jurickson a konektá dos hit for di kua un doblete i un honron miéntras ku e la empuha unu di sinku turno na bate.
Profar di 22 aña, despues di a opera su skouder riba 23 di febrüari a pasa e temporada 2015 kompletu riba lista di hungadó inkapasitá. Na final di e temporada di Liga Menor, Jurickson a hunga 12 partido riba asignashon ku e ekipo di Hickory (A) i Frisco (AA). Akinan e shortstop di Kòrsou a sirbi eksklusivamente komo batido designa i a logra un promedio kombiná di .256 ku un honron, dos doblete i seis kareda empuha. Tambe Jurickson a partisipá huntu ku e ekipo di Liga Instrukshonal.