WILLEMSTAD – E kampionato di MCB-RBI 2015 por wak atras riba e promé fin di siman kompleto di akshon eksitoso den e kategoria Junior (13-15 aña). Ku un bon públiko presente tantu djabièrnè, djasabra na Tio Daou komo djadumingu na Stadion di Rif por bisa RBI ta enbèrdat bek.
Djabièrnè anochi, Chris Koeiman tabata dominante tantu ku su bate komo su picheo pa guia Sta. Rosa Indians na un viktoria di 3-1 riba Sta. Maria Pirates. Pa Pirates 1 kareda, 6 hit i 2 eror. Picher perdedor tabata Tilsaimy Melfor i vários bateador a bai di 2-1. Pa Sta. Rosa 3 kareda, 2 hit i 2 eror. Picher ganador tabata Chris Koeiman i e mes a bai di 3-1 ku un honron den tereno.
Den e promé wega di djasabra, e ekipo di Trai Seru Dodgers tabata muchu fuerte pa e ekipo di Jandoret Braves ganando ku in skor di 22-2 den tres ining pa medio di asina yama ‘blackout’. Pa Jandoret 2 kareda, 0 hit i 4 eror. Pitcher perdedor tabata Jonathan Ferreira. Pa Trai Seru Dodgers, 22 kareda, 18 hit i 4 eror. Pitcher ganador tabata Yarden Lionarons ku no a permití hit den e wega aki. Dayten Biegel a konekta 3 hit i empuhá 4 kareda pa Dodgers.
Despues a sigui e wega entre Sta. Rosa Indians i Marchena Reds ku a bin kaba den un empate di 10-10 riba e fecha nashonal di 10-10. Pa Sta. Rosa 10 kareda, 8 hit i 3 eror. Chris Koeiman a konektá un mas honron den tereno i Hermain Habat tabatin un honron pa empatá e wega na 10 den nan último turno na bate di su ekipo. Pa Reds, 10 kareda, 3 hit 3 eror. Frensley Leito a bai di 2-01 na bate.
Por ultimo Sta. Maria Pirates a logra nan promé viktoria di e kampionato nobo aki ganando di Montaña Abou Rangers ku skor di 15-8. Pa Montaña Abou 8 kareda, 5 hit i 2 eror. Kevin Cicilia a resultá e picher perdedor i Etmond Jops a bai di 2-2 na bate. Pa Sta. Maria Pirates 15 kareda 7 hit i no a kometé eror, Hooi i Daal a bai di 2-2.
Djadumingu e ekipo di Marchena Reds tambe a logra nan promé viktoria ganando di Brievengat Orioles ku skor di 6-5. Pa Reds, 6 kareda 5 hit i 4 eror. Tarich Campagnard a konekta dos triple den e wega aki. Pa Orioles, 5 kareda 5 hit i no a kometé eror. Pitcher Halim Rosalina a resulta e perdedor i Jurvensly Tokaay a bai di 2-2.
Por último tabata e ekipo di Montaña Abou Rangers ku tambe a haña number di kas ku un viktoria di 9-2 riba Trai Seru Dodgers. Ruendly Carolina tabata instrumental den e viktoria aki pa su ekipo tantu na plato komo riba montikulo. Pa Trai Seru Dodgers 2 kareda 6 hit 3 eror. Pitcher pèrdèdó tabata Shane Quant i varis bateador a bai di 2-1. Pa Rangers, 9 kareda 11 hit i 1 eror. Pitcher ganador tabata Carolina i e mes tabata mihó na bate di 4-3.
Pa haña un relato mas amplio i tambe sifranan di e weganan por bai riba rbicuracao.com i tambe Facebook. Kòrda ku semper por sigui e weganan bibu na kas riba kòmpiuter, laptop òf telefon via di gamechanger.com. Djis buska rbi curacao junior i por selektá bo ekipo faborito. Tur esaki ta posibel danki na e patrosinio di MCB i Refineria Isla.