MERKA — Ainda e temporada di beisbòl 2015 no a yega na su fin i ya kaba ekspertonan a kuminsá proyektá e salarionan di arbitrahe pa 2016. E ekipo di Los Angeles Dodgers inisialmente ta bai tin 11 pelotero ku ta elegibel pa arbitrahe salarial, entrenan Kenley Jansen.
E fecha limite pa hasi un oferta na peloteronan ku ta elegibel pa arbitrahe ta djárason, 2 di desèmber di e aña aki. Den kaso ku e pelotero i e ekipo no yega na un akuerdo e fecha límite pa opta pa arbitrahe salarial ta djamars, 12 di yanüari 2016 ku kada partido entregando un figura salarial riba 15 di yanüari 2016.
Den kaso ku e ekipo i e pelotero no yega na un akuerdo e kaso di arbitrahe salarial lo keda atendé entre 1 pa 20 di febrüari, ku kada banda tresiendo nan kaso dilanti un panel di tres árbitro.
Segun un di e proyekshonnan ku ekspertonan a hasi, Kenley Jansen lo por risibí $11,4 mion pa e temporada 2016. Esaki ta un oumento di mas of ménos $4 mion kompará ku e temporada 2015. Temporada pasa Kenley a yega na un akuerdo ku e ekipo di Los Angeles Dodgers promé ku e kaso di arbitrahe a bai dilanti.
Kenley e temporada aki tabata tin un rèkert di 2-1 ku 36 partido salba i un efektividat di 2.41 den 54 aparishon.