HAPON — Djabièrnè ultimo e ekipo di Tokyo Yakult Swallows a aktivá Wladimir Balentien riba nan roster. Esaki tabata Balentien su promé partido bek ku e ekipo di Swallows despues ku e la leshoná den su úniko partido ku e la hunga e temporada aki na aprel ultimo.
Den e partido di djabièrnè Wladimir a konektá su promé dos hitnan di temporada den kuater turno na bate ku dos kareda empuha den kousa pèrdí. Den e hitnan aki tabata tin e promé honron di temporada di Wladimir.
Djasabra ‘Coco’ a sigui kayente i a konektá tres hit den kuater turno na bate ku dos kareda empuha pa e ekipo di Swallows derota Yomiuri Giants. Dos di e hitnan den e partido aki tabata doblete.
Djadumingu Wladimir no a konektá hit den dos turno na bate ku un base por bola. Aktualmente Balentien tin un promedio di .455 ku un honron un honron i kuater kareda empuha.
Faltando algu mas ku un siman di partido ainda den e Liga di Beisbòl Profeshonal Hapones Nippon, e ekipo di Wladimir, Tokyo Yakult Swallows ta lidera e tabla di posishon den Liga Sentral ku un partido riba Hanshin Tigers.