WILLEMSTAD — Den e wikènt tras di lomba durante e diferente partidonan di Liga MCB por a tuma nota ku e rèfrinan ku a aktua durante e partidonan aki ta tin un suèter bisti ku e mensahe “stòp violensia kontra rèfri”. Esaki ta inisio di e kampaña ku e rèfrinan lokal a lansa pa frena e ola di violensia ku a bin ta lanta kabes kontra rèfrinan lokal. A skohe pa kuminsá e kampaña aki dor di laga tur rèfri aktua durante nan partidonan ku e suèter ku e mensahe i e logo di e kampaña aki.
Durante e partidonan ku rèfrinan a bin ta flùit último tempu diferente rèfri i nan asistentenan di liña a keda menasá na diferente okashon i tin asta algun kaso kaminda rèfrinan a sufri agreshon di forma verbal i físiko. Netamente pa kontra arestá e problemátika aki e rèfrinan a disidí pa kuminsá ku e kampaña pa stòp violensia kontra rèfrinan.
E meta di e kampaña aki ta na promé lugá pa stòp ku e violensia kontra rèfrinan manera e lema mes ta bisa pero tambe pa konsientisá pueblo riba e trabou importante ku rèfrinan ta ehersé durante kada partido. Un rèfri mester por opservá e hugadanan, analisá esakinan i tuma un desishon basá riba e reglanan futbòl. E desishon aki ta benefisiá un ekipo miéntras e por perhudiká e otro. Esaki por trese malkontentu serka algun fanátiko, dirigente i spesialmente e hungadónan di e ekipo pero esei no mester ta motibu pa aktua di forma violento kontra rèfri. Tur e insidentenan aki tin un impakto negativo riba nos futbòl lokal ku e konsekuensia ku hopi fanátiko no ta bin presensia nos wega nan mas i ku te asta tin rèfrinan ku a retirá. Tambe tin hopi hóben ku no tin interes pa sigui kursonan di arbitrahe debí na e miedu di por sufri algun tipo di agreshon durante òf despues di wega.
Ta e intenshon pa den futuro bin ku mas artíkulonan, banda di e suèternan aki, pa sostené e kampaña aki. Artíkulonan manera, ‘polsbandjes’, stekernan pa pega na outo i hopi mas pa yuda konsientisá e pueblo amante di futbòl riba e problemátika aki i pa stòp ku e violensia kontra rèfri!
Futbòl ta di nos tur i huntu nos mester logra hiba e deporte aki dilanti. Laga nos tur ban kontribuí na e kampaña aki i ‘Stòp violensia kontra rèfri’!