MERKA — E organisashon di Atlanta Braves ayera a anunsiá su hungadónan di aña den Liga Menor. Akinan Ozhaino Albies a risibí e distinshon pa e ekipo di Rome Braves. Ozhaino den su di dos temporada di beisbòl profeshonal a konektá 122 hit den 98 partido ku Rome Braves. Ku esaki e pelotero a logra un promedio di .310 ku 21 doblete i 64 kareda anotá.
Albies ku a keda nombra tambe komo South Atlantic League All-Star a finalisá temporada di dos den e ekipo ku 29 base roba. Pa su prestashonnan ofensivo tambe Ozhaino a keda skohe algun dia pasa komo e MVP ofensivo pa e ekipo di Rome Braves. Adishonal, e pelotero di Kòrsou a keda nombra komo MVP di e ekipo tambe.