WILLEMSTAD — Apesar di a keda menshoná riba e lista inisial di hungadónan ku a keda konvoká pa e selekshon di Kòrsou kontra El Salvador, Roly Bonevacia i Guyon Fernandez lo no ta ku e selekshon. E selekshon di Kòrsou ta enfrentá El Salvador den e di tres buèlta di e eliminatorio pa Mundial Rusia 2018.
Roly Bonevacia no ta muchu interesá den hasi e biahe for di Wellington, Zelandia Nobo pa Kòrsou. Segun un investigashon hasi lo tuma e medio-kampista di Wellington Phoenix por lo ménos 35 ora pa por yega Kòrsou for di Zelandia Nobo.
Di otro banda, Guyon Fernandez no por bandoná Australia. E delantero di 29 aña a kaba di sera un kontrakt ku e ekipo di Perth Glory na Australia i ta den trámite di Visa. Esaki ta pone ku Fernandez no por bandoná e pais te ora su Visa keda kla.
Miéntras tantu Gillian Justiana a keda konvoká di nobo pa e selekshon di Kòrsou. Tambe tin informashonnan ku Federashon Futbòl Kòrsou ta tras di un hungadó ku ta hunga na Bèlgika. Nòmber di e futbolista aki no a keda menshoná ainda, aunke nos a tende algun nòmber pero ta wanta esaki te ora nos tin konfirmashon.