MERKA — Jurickson Profar a uni su mes ku e ekipo di Hickory Crawdads den Klase A riba un asignashon di rehabilitashon, segun informashonnan. E pensamentu ta ku den e próksimo dianan por kuminsá sirbi komo batido designa. Sin embargo, e organisashon di Texas Rangers no a tuma un desishon definitivo riba esaki ainda.
Jurickson for di algun siman pasa kaba, tabata praktiká ku e ekipo di Dobel A, Frisco RoughRiders. For di e momentu ey tabata tin indikashonnan ku Jurickson lo por mira akshon e temporada aki ainda. Pero na e momentu ey tambe e organisashon di Texas Rangers tabata hopi kouteloso i no kier a divulgá nan plannan pa ku Jurickson. Na e momentu ey e pensamentu tabata ku Jurickson lo por a mira akshon den e ultimo partidonan di Frisco of despues di temporada den Liga Instrukshonal of Fall League.
Jurickon a pèrdè e ultimo dos temporadanan pa motibu di leshon na skouder. Dia 23 di febrüari ultimo e pelotero a opera su skouder. Den Hickory Crawdads, Jurickson ta uni su mes ku su ruman Juremi ku ta den e ekipo di Crawdads for di yüni ultimo.