WILLEMSTAD — Den wikènt tras di lomba Liga MCB Promé Divishon su buèlta di seis a kontinuá ku tres partido den Stadion Antoine Maduro. Riba djabièrnè den e promé partido e ekipo di UNDEBA a enfrentá Centro Dominguito. Akinan tabata Centro Dominguito ku a sali di e porta grandi, derotando UNDEBA ku skor di 2-0. E golnan di Centro Dominguito a keda anotá pa, Shayron Bernardus i Henry Every.
Djasabra e buèlta di 6 a kontinuá ku e partido entre Hubentut Fortuna i Victory Boys. Ambos ekipo a hasi bon ku otro den e partido aki i a empatá na 1 gol pa banda. Pa Victory Boys a gol a keda anotá pa Damian de Kaster, miéntras ku e gol di Hubentut Fortuna a keda anotá pa Dario Causil Arias.
Riba djadumingu tabata Jong Holland ku a topa ku Centro Barber. E partido aki tambe a finalisá na un empatá na 1 gol. Pa Centro Barber e gol a keda anotá pa Mirco Colina Jr., miéntras ku pa Jong Holland e gol a keda anotá pa Julian Sanchez Perez.