MERKA — E periodista di The Boston Globe, Nick Cafardo a trese diferente sugerensia pa mehorá e ekipo di Boston Red Sox. Segun Cafardo, tin diferente kos ku e ekipo di Boston tin ku hasi den e offseason benidero.
E periodista ta sugerí pa probechá di e situashon di New York Mets. Segun Cafardo, Mets no por bai solushoná nan problemanan ofensivo ku agente liber den offseason, paso probablemente e ekipo no ta bai gasta sen. Pues e ekipo lo tin ku usa su profundidat di picheo pa hasi esaki.
Segun Cafardo un sugerensia ta purba haña Matt Harvey pa Xander Bogaerts. E malu di esaki segun Cafardo ta ku Boston ta pèrdè un hungadó estelar pero e ekipo ta probechá dor di risibí un di e top picher hóben den Liga Grandi.
Matt Harvey di 26 aña di edat tin un rèkert e temporada aki di 10-7 ku un efektividat di 2.76 den 21 salida. Na 2014 e pelotero no a hunga despues ku na òktober di 2013 e la hasi e operashon di Tommy John. Promé ku e la leshoná na 2013 tambe Harvey tabata tin un bon temporada ku un rèkert di 9-5 ku un efektividat di 2.27 den 26 salida.
Un posibel remplaso pa Bogaerts lo ta Deven Marrero, e periodista ta sugerí. Ta un bon moveshon pa Mets, ku tin mester di un strea hóben den na kuadro. Bogaerts a konektá solamente tres honron e temporada aki, pero bo por spera mas poder den futuro.
E argumento kontra di e kambio aki segun Cafardo ta ku Bogaerts ta birando, of ta kaba e mihó batido di Boston.