MERKA — Andruw Jones ke bolbe hunga den Liga Grandi otro aña. Esei ta loke e pelotero di Kòrsou a ekspresá na Fox Sports South ayera nochi. Andruw tabata presente durante e transmishon di e partido di ayera entre Miami Marlins i Atlanta Braves.
Segun Andruw e la trata na regresá Liga Grandi e aña aki pero sin resultado. “Ma haña algun yamada, pero nada no a sali afó,” Jones a bisa.
E pelotero di 38 aña a añadí ku den futuro serka nò lo e retirá for di beisbòl profeshonal, pero ku ainda e no ta kla pa esaki.
“Simplemente mi kier a bai Spring Training i purba, wak kiko ta pasa,” Andruw a bisa di su ideanan di regresá promé ku temporada kuminsá. “Mi ta bai purba un biaha mas otro aña, i si mi no keda kla, lo mi retirá.”
Gran parti di su karera Andruw a pasa ku e ekipo di Atlanta Braves, kaminda e la gana 10 Wante di Oro ku e ekipo durante añanan 1998 pa 2007. Despues di Atlanta, Jones a pasa temporadanan ku e ekipo di Los Angeles Dodgers, Texas Ranges, Chicago White Sox i New York Yankees. Tambe Andruw a hunga dos aña den beisbòl profeshonal na Hapon ku e ekipo di Tohoku Rakuten Golden Eagles.