WILLEMSTAD — Victor Elhage, kofundador di organisashon di Little League Kòrsou, boluntario pa mas ku kuarenta aña, district administrator di Little League, a anunsiá su retiru ofisialmente komo district administrator. Anteriormente señor Victor Elhage a deklará na prensa ku e lo baha komo district administrator, despues ku e kaba di organisá e torneo internashonal di Little League Caribe 2015, den tur kaso na final di su periodo aktual komo district administrator. E torneo di Caribe a sera ku hopi éksito fin di luna di yüli.
Victor ku na aña 1974 a wòrdu aserka pa forma parti di e organisashon di Little League dor di señor Boy Tweeboom (qepd), ta hopi orguyoso i satisfecho di su temporada den Little League. For di komienso, den añanan setenta bin ariba, Little League a risibí sosten di SEDREKO. Den e último diesinku añanan RBC-bank a duna un sosten sumamente balioso na e organisashon. Despues ku SEDREKO a stòp di eksistí, Gobièrnu di Kòrsou a koperá en grande ku Little League. Victor ta gradisí tur sobra spònser ku a koperá durante di tur e añanan ku Little League.
Danki na nos spònsernan, ku den region, Kòrsou ta un eksepshon, apesar di e tempu di krísis finansiero ekonómiko ku ta reina rònt mundu, tòg Kòrsou ta partisipá anulamentu na kasi tur torneo Latinoamerikano i di Caribe.
Victor a sirbi den kasi tur nivel di e organisashon di Little League, di aña 2001 te ku aña 2004 Victor tabata miembro di e bestür di Williamsport, e órgano di mas haltu di little league mundial. Notabel ta ku Victor tabata e promé miembro di region latinoamerikano ku a okupá e puesto den bestür. Victor tabata district administrator na St. Maarten i Bonaire tambe.
Un otro proyekto ku Victor ta hopi orguyoso di dje ta ku bou di su direkshon, señor Kenneth Desbarida a hasi tremendo trabou di lanta Challenger League na Kòrsou. Challenger League ta un liga di baseball pa hóbennan ku desabilidat mental i/o físiko. Komo district administrator Victor huntu ku su bon amigu Cecil Garcia a lanta Softball Little League, ku durante di añanan tabatin hopi éksito na Kòrsou.
Kòrsou ta un di e poko paisnan den region Latinoamerikano ku tin e programanan di tantu Challenger komo Softball. Williamsport tur aña di nobo ta hasi esfuersonan grandi pa stimulá e paisnan pa desaroyá e programanan aki.
Victor ta hopi agradesido na Kenneth Desbarida ku durante di un periodo basta largu a traha komo sekretario di Victor. Kenneth huntu ku Victor a reuní ku señor Carlos Pagan, i representantenan di Williamsport, na okashon di inisio di Liga Willemstad. Einan tambe Kenneth a hasi un gran trabou di repartishon di e tres liganan, ku awe nos por tin liga Willemstad, kaminda mas hóben por partisipá den e programa di Little League.
Durante temporada di Victor komo district administrator, Kòrsou a titulá kampeon Caribe, Latinoamerikano i mundial den kasi tur divishon di baseball i softball little league. Victor a mira kon siudadanonan ku a tabata miembro di little league a forma i bira lidernan grandi den komunidat.
Victor, ku su temporada ofisialmente ta kaba pa fin di aña aki, for di awor aki kier a gradisí, tur ku a yuda pa su temporada komo district administrator ta un éksito. Tur boluntario, dirigentenan, miembronan di e diferente direktivanan, tur umpire i skorer, famianan, tur miembro di prensa gobièrnu i henter pueblo di Kòrsou. Un danki spesial ta bai na Urny Floran ku durante di e delaster añanan a fungi komo sekretario i asistente di district administrator.